ORANJESTAD (AAN): Despues cu dos siman pasa agrupacion musical Melodia a yena
un sala completo cu un publico bon anima pa cu por a presencia nan concierto, awor nan ta cla pa lansa nan cancion promocional.
Den nan celebracion di 15 aña consecutivo presentando produccionnan durante diferente temporada di aña, recientemente a duna e publico un bunita show cu un repertorio cu a sorpresa tur presente y cu a goza di e anochi.
Mientrastanto grupo Melodia a drenta nan studio di grabacion tambe pa asina cuminsa prepara pa fin di aña cu nan produccionnan manera semper.
Melodia ta conoci tambe den e temporada di fin di aña cu composicionnan nobo y propio, cu semper tin e variacion den ritmo, cantante, compositor, y tambe sa agrega cancionnan popular y clasico den nan version.
Melodia ta lansa su cancion promocional cu e titulo “Laga nos Ban Gosa” cu ta un composicion di Rubin Ponson y areglo di Michael Odor y Rubin Ponson, interpreta pa Reanne Ras.
Esaki ta un cancion special pa nan celebracion di 15 aña, cu un ritmo contagioso cu nos ta sigur lo bay zona bon den nan presentacionnan durante e fin di aña aki.
Melodia cu su zonido unico y cu su diferente hits musical pa 15 aña, y tambe cancionnan popular interpreta den nan estilo, lo bay deleita nos pueblo un biaha mas cu sigur un repertorio bon prepara cu tur nan cancionnan.
