ORANJESTAD (AAN) – Den e prome articulo di e entrevista cu Meester dr. Jayburtt J. Dijkhoff, cu diamars a defende su tesis “Regulacion di e
calidad di cuido: e derecho riba calidad di cuido na Aruba”, por lesa cu nos a keda den su contesta riba e pregunta: -Unda calidad di cuido ta faya?-
E siguiente pregunta ta: -Na unda ley ta faya pa proteha e pashent/cliente?-
Meester dr. Dijkhoff a duna como contesta: “Den Reino Hulandes y na Aruba tambe, e leynan ta dirigi principalmente pa proteha e pashent. E punto di salida ta cu e pashent no tin e conocemento medico pa por determina si e calidad di cuido ta bon of no. Ley ta duna e proteccion necesario pa medio di derechonan, of supervision, riba e cuido brinda. Sinembargo, den practica e resultado di e investigacion a mustra cu e leynan den cuido no ta suficientemente efectivo. Hopi hende no ta entrega keho of nan keho no ta resulta exitoso. Esaki ta hiba na e situacion cu no tin un ciclo di mehoracion continuo, pa motibo tambe cu e normanan di calidad frecuentemente ta vago. Esaki ta haci cu e supervision y mecanismonan di control riba cuido, ta bira mas dificil.
“Es mas, Aruba no a introduci ainda mas derecho di pashent manera e participacion activo den e maneho di instancianan di cuido. Esaki a hiba tambe na e situacion cu lamentablemente tin, por lo menos, un violacion di derecho humano conforme e Tratado Europeo di Derechonan Humano, specificamente pa locual ta trata con ta determina e causa di morto den sector di cuido. Pa e motibo aki varios sugerencia a wordo haci den e investigacion pa asina mehora e situacion riba termino corto”, mr.dr. Dijkhoff a subraya.
Kico Aruba por haci pa yega mas cerca e nivel di Hulanda y di con Hulanda?
“Aruba a tuma e decision pa sigui e modelo Hulandes. Esaki ta haci cu pais Aruba activamente, mester tuma pasonan necesario pa yega na e nivel Hulandes tambe.
Varios cambio di e leynan di regulacion lo ta necesario, pero esaki mester forma un cambio integral. Varios ley ta anticua y otronan no ta wordo aplica optimalmente ainda.
E investigacion ta duna un ruta cu gobierno di Aruba por tuma, pa por remedia e situacion” mr.dr. Dijkhoff a indica.
Kico ta e resultadonan cu a spera di e investigacion y kico ta esnan inespera? “Como investigador mi por bisa cu semper lo bay tin resultadonan cu por spera. Tin biaha ta presenta sorpresanan tambe durante e proceso. Manera por a spera e
necesidad pa revisa leynan anticua tabata un di e cambionan mas necesario cu a wordo señala. Tambe, e manera con e leynan ta wordo ehecuta tabata di spera cu por haya mas refuerzo.
E resultadonan inespera, den e caso aki, tabata primeramente cu den practica e sector di cuido ta sigui Hulanda su leynan mas cu e leynan di Aruba. Esaki ta pa motibo di
necesidad pa clarifica e normanan al dia. Un otro resultado inespera ta regarda e hecho cu na e momento cu un persona fayece den cuido, e medico tratante ta determina e causa di morto y mayoria biaha autopsia no ta wordo haci, ni si e famia pidi pa esaki.
For di punto di bista di derechonan humano, esaki mester wordo revisa. E idea no ta pa culpa e dunadornan di cuido, pero pa e organizacion analiza y evita erornan pa futuro y pa mehora e calidad continuamente”.
Mensahe pa comunidad:
Pa conclui, mr.dr. Jayburtt J. Dijkhoff a trece dilanti e siguiente mensahe pa comunidad di Aruba:
“Calidad di cuido ta rekeri di un cooperacion di henter nos pais. Aruba mester yega na un vision pa futuro y pa ancra esaki den un sistema integral pa por garantiza e calidad di cuido. Mi ta spera cu esaki ta e comienzo di un aporte y un discusion necesario pa sigui mehora e calidad di cuido pa awo y e futuro generacion”. Asina mr. dr. Jayburtt Dijkhoff a conclui su entrevista exclusivo cu Matutino DIARIO.
DIARIO ta desea mr.dr. Jayburtt Dijkhoff hopi exito cu su titulo nobo di Doctor den Ley.
