Interes riba debe nacional ya ta stroba proyectonan pa grandinan
*Turismo di Aruba mester enfrenta retonan mundial y di clima
*Fondonan pa adulto mayor tambe ta depende di ingreso turismo
ORANJESTAD (AAN) — E interes cu Aruba mester paga riba debenan, segun cifranan oficial di Reino, na e momentonan aki ta 17 Florin riba cada 100 Florin. Pues 17 porciento di pagonan cu Aruba mester haci, ta bay na paga e debenan di e pais.
Manera informantenan experto di DIARIO ta mustra, e peso di debenan cu Mike a crea deliberadamente pa Aruba durante su gobernacion, a bira peso cu ta stroba comunidad di hinca mas placa den e reto serio cu ta manifesta su mes mundialmente den cuido di ancianonan.
“E forma cu Mike Eman atrobe ta scoge pa uza grandinan pa e haya mas voto, sin duda ta entrega e prueba cu no por considera Mike Eman ministeriabel. Mike a presenta un promesa sin ningun base cu e por cumpli cune, informantenan a indica.
“Ora papia di Mike Eman, ta papia di un persona cu a hinca Aruba den aventura serio, cu a afecta e cartera di e ciudadano no solamente cu e pago di belasting pa cubri su debenan,”a bini dilanti.
Aruba a keda sin entrada di Citgo, pero ta wordo lubida kico a pasa cu e Pueblo di Aruba cu Mike Eman a hipnotisa cu su promesanan di un rio di oro pa Aruba y tur Arubiano, y a base di esaki a haci debe enorme na incluso banconan.
“Kico a pasa na Aruba na 2017? Negoshinan no tabata sa kico haci cu nan mes y tur nan inversionnan en espera di un crecemento economico enorme a base di e siguranza cu Mike a duna cu Citgo lo trece bonanza pa e pais,”informantenan clave a duna di conoce.
A wordo mustra cu en espera di Citgo, cantidad di hende a haci debe grandi y a cuminsa mara nan mes na compra di tur loke nan a pensa nan lo por a paga cu interes, ora Citgo drenta Aruba.
Na 2017 un crisis mucho mas severo cu generalmente ta wordo pensa, a presenta su mes na Aruba no solamente pa medidanan di Hulanda pero pa debenan enorme cu cantidad di ciudadano y compania a haci en espera di yegada di Citgo.
Manera ta wordo splica awor na DIARIO, 2017 a topa cu un Aruba completamente confuso, cu debe personal y empresarial, mientras ni Banco Central mes por a bisa kico lo a pasa a base di e promesanan falso di Mike Eman.
Na mes momento loke si tabata un hecho, a bira e peso nobo di pago di tur e debenan cu Mike a laga atras pa Pueblo paga, mientras e mes a huy.
“Awe historia ta ripiti,”informantenan sumamente preocupa ta indica.
Ta hustamente e hecho cu Mike Eman a laga Aruba den debe, a afecta tambe tur loke comunidad tabata tin disponibel pa a crea mas espacio cu a wordo crea, pa por a atende cu e situacion di grandinan, cu e debe di Mike tambe a stroba di goza di mas entrada y beneficio di Aruba.
Na e momentonan aki ta e grupo mas vunerabel di Aruba, cu ta grandinan cu pensioen di behez, a confia den palabra di Mike Eman y awor ta wordo defrauda.
E hecho cu awor Mike Eman ta papia di introduccion di medidanan cu turista mester paga, lo destrui e pais economicamente y financieramente.
Segun informantenan a keda demostra cu Mike no tabata sabi di kico e ta papia ora el a lanza e promesa di bay aumenta pensioen di behez cu 700 Florin pa asina e haya voto di personanan cu ta goza di pensioen di behez.
Mike a abusa di un necesidad social atrobe, manera informantenan ta trece dilanti.
“Mike awe kier mishi cu e baca cu ta produci lechi pa henter Aruba na un momento di crisis mundial. Aumento di cualkier tarifa pa e turista, automaticamente ta afecta e sector di turismo cu a haci inversionnan enorme pa alcansa logronan actual,” a bini dilanti.
Informantenan ta indica cu na e momento cu bira conoci cu lo introduci medidanan financiero den mundo di turismo, Aruba a condena e galiña cu ta pone webo di oro, na morto.
Suspenso enorme y creciente ta reina na Aruba, cu a traha duro riba su recuperacion den un trankilidad, harmonia y speranza te na momento cu Mike Eman a bolbe pa ripiti su entrada glorioso manera a socede na 2009 ora el a priminti di deshaci di BBO y a hiba un maneho cu a aumenta tur peso di belasting pa Aruba.
Hopi preocupacion ta reina den tur sector cu ta conciente di gastonan cu ta spera tanto poblacion como sector di turismo y comercio en general relaciona cu medidanan pa cambio di clima, cu na paisnan grandi ya ta forma problema serio.
Si na e momentonan aki bay aumenta peso pa turismo, turistanan ta keda cas of ta dicidi pa otro destinacionnan, cu gustosamente lo reemplaza Aruba riba lista di destinacion pa asina asegura nan mes mas entrada den temponan mundial dificil.
