MDC ta un pilar den e sistema educativo cu ta guia y empodera hoben y educador

Minister Gerlien Croes:

ORANJESTAD (AAN): Diaranson mainta, Minister di Enseñansa, Gerlien Croes, a haci un bishita di orientacion na Centro Multidisciplinario (MDC). E bishita ta pone enfoke riba un pilar fundamental pa calidad di enseñansa: e bienestar emocional, psicologico y pedagogico di nos muchanan, y e sosten cu nos educadornan mester pa guia nan den su totalidad.

            MDC ta sirbi un proposito amplio: duna guia, evaluacion y sosten na scolnan y famianan cu tin preocupacion tocante hoben cu ta enfrenta obstaculo den su desaroyo escolar. Cu un ekipo multidisciplinario cu ta inclui psycologonan, logopedista, trahadornan didactico, terapista motorico y experto den nutricion, MDC ta un pilar esencial pa sostene e sistema educativo—pero mester amplia e capacidad y sosten na MDC mas aun. E apoyo cu MDC ta duna no ta limita pa studiante so, sino tambe pa docente y asistente, a traves di e Teacher Care Unit, cu ta brinda asistencia psycologico.

Formacion GZ-Psycholoog: un paso adelante pa cuido integral

            Diamars merdia, un acuerdo di estudio entre e Ministerio di Enseñansa, Centro Multidisciplinario (MDC) y compania Psymia a wordo firma oficialmente. E acuerdo ta marca e inicio di e formacion na nivel di Post-Master pa un grupo di psicologo local por bira GZ-psycholoog (Gezondheidszorgpsycholoog), un rol clave den atencion clinico y cuido di bienestar mental. GZ-psycholoog ta un nivel mas halto di specialisacion den psicologia cu ta fundamental pa trata casonan compleho den bienestar di hoben.

“Nos no por logra progreso real den enseñansa sin mira e cuido pa e bienestar di e mucha den su totalidad. Cada hoben ta un mundo propio, cu su propio reto y potencial. Nos ta traha pa crea un sistema cu reconoce esaki, y cu ta duna e profesionalnan e hermentnan necesario pa duna sosten real,” Minister Croes a expresa.

Ministerio di Enseñansa lo enfoca riba cuido integral, preventivo y inclusivo. Minister Croes ta ta reafirma su compromiso pa pone bienestar y desaroyo humano central den e sistema educativo Arubiano.