Mayornan ta presencia progreso di hobennan durante Oudersdag di SVT

Jessica Ras di SVT:

ORANJESTAD (AAN) – Despues di tres siman intenso di formacion, mayornan di e hobennan cu a inicia nan trayecto di Formacion Social (SVT) dia 24 di augustus ultimo, a bishita Marinierskazerne den cuadro di e tradicional ‘Dia di Mayor’.

   Señora Jessica Ras di SVT, den un entrevista cu DIARIO, a splica cu e dia special aki ta brinda mayornan e oportunidad pa mira di cerca con nan yiunan ta adapta na e programa y cua progreso nan a logra durante e prome simannan. Nan por a conoce mas tocante e conocemento, disciplina y habilidadnan cu e hobennan ta desaroya, ademas di ricibi informacion adicional tocante e diferente fasenan di e trayecto di SVT.

   Durante e bishita, e hobennan a comparti parti di nan experiencia cu nan famia y a duna demostracion di tur loke nan a siña caba den tres siman. Pa varios mayor, esaki tabata un momento emocional y di orguyo, despues di tres siman cu nan yiunan a permanece den un ambiente nobo, structura y exigente.

   E Oudersdag no solamente ta importante pa e mayornan, pero tambe pa e hobennan. Presencia y sosten di famia por duna nan motivacion adicional pa sigui traha riba nan mes, supera e retonan y completa e trayecto cu exito.

   Segun Ras, despues di tres siman di formacion, e hobennan cu ta sigui participa den e programa, awo por bay cas durante fin di siman. Esaki ta permiti nan pasa tempo cu nan famia, descansa y prepara mentalmente pa continua cu e siguiente fasenan di nan formacion.

   E reencuentro cu nan famia ta marca un momento significativo den e trayecto. Na mes momento, e ta un oportunidad pa mayornan reconoce e cambionan positivo cu ya caba ta bira visibel den nan yiunan y sigui sostene nan durante e resto di e programa.