Señora Romely Flanegin, Director di Tienda di Educacion:
- Segun articulo 18 di tratado di Derechonan di Mucha
ORANJESTAD (AAN): Tienda di Educacion ta promove respet, apoyo y un ambiente sigur caminda muchanan por expresa nan mes y sinti cu nan derechonan tin balor. Diahuebs 20 di November, tawata Dia Internacional di Derecho di Mucha. Señora Romely Flanegin, Director di Tienda di Educacion, den un entrevista cu DIARIO ta splica cu ta mayor y voogd legal ta e prome responsabelnan pa educacion, structura y desaroyo di nan yiu.
Señora Flanegin a remarca cu Tienda di Educacion ta basa riba e articulo number 18 di e tratado di derechonan di mucha. E articulo aki ta pone enfasis riba e importancia di educacion y desaroyo den bida di un mucha na unda cu e mayor of voogd legal ta esun responsabel pa esaki.
Señora Romely a enfatisa cu ta reconoce hopi reto den criansa di muchanan y hopi factor cu ta hunga un rol den esaki, entre otro, mayornan hopi biaha ta traha dos trabou, situacion financiero, y problemanan di relacion. Den e casonan aki, enfoke riba criansa pa duna yiunan educacion y desaroyo manera mester ta, no ta primordial. E efecto of resultado di esaki por mira bek na scol tambe, na unda cu e muchanan no por adapta den structura y rutina di scol pa motibo cu esaki no ta e caso den e situacion na cas.
Tienda di Educacion ta duna guia y sosten na mayornan di muchanan di 0 pa 18 aña (incluyendo tanta, wela y esnan cu ta tuma parti den e criansa) y educadornan. Segun Romely, tin un situacion hopi preocupante pasobra aunke cu ta mayornan, voogd legal ta esnan responsabel pa educacion y desaroyo di nan yiunan, tin e expectativa cu nan ta spera y ta depende cu ta scol mester inculca norma y balornan, scructura y rutina den e muchanan. “Scol tey pa yuda, pero e base, e fundeshi mester cuminsa den cas”, señora Romely Flanegin a enfatisa.
