Mayornan mester ta atento riba uso di “vaping” entre muchanan di scol basico

Rulienne Arends, Trahado Preventivo FADA:

ORANJESTAD (AAN)—Rulienne Arends, Trahado Preventivo na Fundacion Anti Droga Aruba (FADA), a declara den entrevista cu DIARIO, cu lamentablemente e parti di “vaping” bao nos hobennan a bay for di control.

Rulienne a indica cu for di inicio di aña pasa, FADA  a cuminza papia di loke ta vaping pasobra nan a mira hopi hoben di 17, 18 aña ta usando e producto V.  “Pero lamentablemente na final di aña pasa, nos a haya yamada di scolnan basico unda cu nan a cuminza gara muchanan cu e aparato aki. Pues, scondi e alumnonan ta uza e aparato aki unda cu e edad mas jong te unda FADA tin conocimento di dje, actualmente, ta nuebe aña”, Arends a señala.

E dama a indica cu FADA hunto cu scol a duna charla pa e muchanan aki, y nan ta haya sesionnan di motivacion.

Mayoria di nan no a haya e sesionnan completo pero algun si tabata tin mester di sesionnan mas largo.

“Nos ta wak cu di final di aña pasa te comienzo di e aña aki, vaping ta e charla cu nos ta dunando mas hopi durante e aña aki, no unicamente na scol secundario, pero lamentablemente na scolnan basico nos ta papiando riba e tema aki, a peticion di e scolnan sea cu nan a gara mucha na scol of un scol ta bisa otro tambe, y hopi scol ta yamando aworaki pasobra nan no kier haya caso”, Rulienne Arends a señala.

Den algun scol FADA tabata tin anochinan informativo pa mayor, y nan ta aplaudi esnan cu tabata presente, pasobra FADA ta custumbra cu poco mayor ta asisti na e anochinan informativo aki.

No obstante, den e ultimo anochi informativo tabata tin 30 mayor presente. Rulienne a comenta cu naturalmente, algun mayor a haya su mes obliga pasobra su yiu a wordo gara.