Campaña 'Un Carnaval Safe pa tur Mucha y Hoben'
ORANJESTAD (AAN): Den un entrevista cu DIARIO, Orthopedagoog di Departamento di Asunto Social, señora Yvonne Geerman-Bermudez, a bisa cu nan ta sumamente contento cu nan campaña 'Un Carnaval Safe pa tur Mucha y Hoben' ta sigui crece, y sigur nan ta gradici nan sponsors pa sigui apoya y kere den nan.
E campaña 'Un Carnaval Safe pa tur Mucha y Hoben' ta enfoca no solamente riba mayornan di mucha, sino mayornan di hobennan pa motibo cu nan ta mira y tende den noticia, coleganan di Cuerpo Policial, y medionan social, tur e incidentenan cu muchanan chikito, baby, tin biaha hasta recien naci, mamanan na estado cu ta para oranan largo of oranan di anochi ta banda di caminda durante paradanan.
E sonido, solo, cansancio no ta na bienestar di e muchanan. Si mester considera riba termino largo, ta importante pa cuminsa concientisa e mamanan na estado.
E ley di sonido a caba di pasa, cu por trece mas concientisacion den comunidad. Nan ta spera cu por tin sancionnan mara na dje. Banda di esey, nan ta kere no solamente e sonido, pero tambe solo, falta di sunblock, un lugar adecuado na unda e mucha por sinta den fresco, bisti adecuado, manera cu un pechi y pañanan fresco, como tambe no perde bista riba bo yiu.
No mester lubida cu como mayor bo ta e ehempel pa bo yiu. Si un mayor ta bebe, nan por 'lubida' cu nan mester keda pendiente di nan yiu. Muchanan ta agil, y nan ta bay bao di baricada, of ta bay patras y mayornan ta perde nan di bista. Y tur cos por pasa, señora Bermudez a enfatisa. Si e mayor tin drinks aden, nan tolerancia por ta menos, y no tin pasenshi pa cuida e mucha y por hasta lubida di check si nan a come.
E campaña a inclui mayornan di hoben, pasobra mayor y hoben mester tin un palabracion durante e temporada aki. Señora Bermudez a enfatisa cu ta hopi importante pa tur mayor papia cu nan yiu y haci palabracionnan pa tur evento y den tur eventualidad. Por ehempel, palabra na unda nan ta bay, cu ken nan ta bay, con nan ta yega y con nan ta bin bek.
