Directie Natuur en Milieu:
ORANJESTAD (AAN): Directie Natuur en Milieu ta indica cu Calco ta un especie antiguo marino y nan ta yama e sorto aki tambe Calco Indjan y na Ingles su nomber ta Caribbean crown conch. Su nomber cientifico ta Melonga melongena, nan ta un especie marino cu un casca di cocolishi grandi cu ta considera un molusco (schelpdier) cu ta move.
Como cu e ta un molusco gasteropodo marino di e famia Melongenidae, e tin un organo sensorial, cu ta inclui sinti y vision. E tin dos tentaculo y na esaki e tin wowo pega. E sorto di calco aki por reconoce na su forma spiraal cu 3 rij di punta punta cu ta varia dependiendo di su grandura di casca.
E calco aki por crece bira entre 5.5 y 10 centimeter grandi. Su color ta shinishi cu bruin y crème cu ta lombra. E calco aki ta carnivoro y ta come otro molusconan chikito manera mossels, oyster y scalops. Calco ta biba scondi den yerbanan di lama y areanan no hundo unda tin lodo na e suela den lama. Den e parti moli den e suela unda matanan di mangel ta crece.
E calco macho ta expone su organo reproductivo pa e proceso di fertilisacion por tuma luga. E embranan ta laga webonan bay den awa manera un slijm den forma di un hilo largo. Un masa di webo ta bay liber den lama manera larvanan cu ta flota despues nan broei den 3 of 4 dia.
Un calco Indjan por biba 25 aña dependiendo di factornan manera condicion di su habitat y si no gar’e pa consumo.
Nos antepasadonan a consumi hopi di e sorto aki y tambe a traha herment, arma y joyas cu e casca di e bestia. Mayoria sorto di calco ta na peliger pa via cu hende ta gara esakinan pa come of bende. Y den nan mesun habitat nan ta presa pa sortonan manera tribon, chuchu y otro piscanan.
E restaurantnan na Aruba ta importa otro sorto di calconan cu ta wordo cultiva cu e proposito di comercio, esaki nan ta pone riba nan menu. Pues no e Calco Indjan of esunnan protegi.
