Ofo Escudero ta spera cu por reuni cu Crisis Team: - ORANJESTAD (AAN): Ofo Escudero, di Æ-2020 Aruba Entertainment, den conferencia di prensa
a trece dilanti con e situacion di esnan cu ta biba di musica ta, desde cuminzamento di e pandemia.
El a splica cu mayoria di nan no tin mas entrada cu FASE, y el a comenta cu nan ta gradici si, cu alomenos esey nan tin, pero e no ta algo cu mester biba cune pa largo tempo, pasobra na dado momento e no ta yega.
Ofo Escudero a comenta cu prome nan tabata tin reunionnan hopi extenso cu Crisis Team, cu a bay den bon tera, pero e biaha aki no tabata tin ningun tipo di comunicacion, pa nan sinta na mesa y busca e miho solucion, pasobra nan ta di acuerdo cu algo mester worde haci, nan sa cu e variante tey y cu e ta peligroso. “Pero nos por a sinta y corda nan locual a worde papia caba, cu e medidanan cu nan a tuma ta simplemente laga nos na cas sin cobra, pasobra tur e lugarnan for di Diabierna unda tin happy our ta djis ta pone musica di Youtube. Nos ta contento si cu kizas un DJ ta pone e musica cu nan ta toca, pasobra nan tin trabao.
Pero kico ta diferencia di locual ta e medidanan cu nan a tuma, y locual cu e realidad nan lo yuda? Nos ta di opinion cu e lo no yuda. Esaki a worde treci dilanti den reunionnan. Nos ta custumbrando e doño di e lugarnan cu musica di youtu ta suficiente, y ta haci su lugar yen. Un persona cu kier sali e ta hacie sea tin banda en bibo of no.
Pues, esey ta un precedente cu nos no kier pa pasa, pasobra e ta desastroso pa e industria aki”, Ofo Escudero a señala.
Seguidamente señor Chayo Tromp, a agrega y reitera cu nan ta di acuerdo cu Crisis Team mester bin cu algo, pero lo ta great si nan por sinta cu e grupo di Entertainment aki, wak na unda por pone e situacion den balansa. El a expresa cu mescos cu ora e pandemia a bin cu seis hende a lockdown aeropuerto, pero segun esaki a bay a siña con pa deal cune, pues kico pa corta y kico no. E hotelnan ta 100% y toch e musiconan no mag toca drum, of otro instrument y gana algo.
Esaki ta e parti fastioso unda tin contractnan ta worde kibra y ta dificil pa yega na esaki back. E ta spera nan por yega na otro. El a subraya cu tur musico ta vacuna, y cu por pidi pa warda distancia, entre otro medida, cu no ta drastico.
Ofo Escudero a tuma palabra atrobe y a bisa cu nan a drecha e diferencianan cu e otro organizacionnan musical, manera AMA y Musica, y esey ta importante pasobra aworaki nan mester ta completamente hunto y tanten cu tin musico eyfo, nan por ta sigur cu tin hende ta trahando. Nan ta den contacto constante y ta purba haci algo pa cu e situacion aki di e pandemia.
