ORANJESTAD (AAN)- Tin varios ciudadano cu ta contento cu DVG a organiza e di dos vacunathon pa Diadomingo, na Ritz Carton, y cu ta spera cu hopi persona di 12 aña bay ariba, por yega vacuna, y cu e logra un acogida masal.
Ta reina hopi preocupacion den pueblo, cu na apertura di aña escolar 2021-2022 por bolbe surgi contagio den e ambiente escolar, mirando cu varios famia a bay afo cu vacacion y cu no ta un exigencia na tur pais pa tur bishitante drenta full vacuna, pero mas tanto haci test.
Pero test cu resultado negativo ni si sali positivo y e persona mester a keda den cuarentena afo, no kiermen cu ora di drenta Aruba e personanan aki ta liber di cualkier riesgo di contagio y menos si nan no ta vacuna ainda.
E preocupacion cu tin ta cu si surgi contagio na scolnan y lo mester cera porta atrobe, un bez mas enseñanza ta bay atras, y mas ainda e salud di maestro, alumnonan y famianan mirando cu Delta ta afectando seriamente hopi mucha rond mundo. Pesey lo miho cu por sosode ta cu un grupo basta grandi di ciudadano den edad di 12 aña bay ariba probecha di e vacunathon di Diadomingo awor!
