Minouche Lopez di Fundacion Pro Lechi Mama Aruba:
ORANJESTAD (AAN) – Minouche Lopez a duna di conoce, den entrevista cu DIARIO, cu e ta trahando 'full time' pa Departamento di Salud (DVG) ainda, y Fundacion Pro Lechi Mama Aruba y su persona mes ta hayando yamada tur dia, specialmente riba e tema di duna lech'i pecho ora e mama a bolbe trabao.
Nan mes ta intermedia cu doño di trabao, por ehemplo, ora e no sa exactamente bon, of e mama no sa, of no ta logra, of simplemente ora un doño di trabao ta pensa cu e mama no ta duna pecho, pero e ta haci abuso.
“E ora ey nos por wak si esaki ta berdad of no. Mayoria di biaha e mama ta duna pecho, pero semper ta keda un grupo chikito cu no ta haci bon uso di e ley. Mi ta bisa semper ‘si bo no ta duna pecho bo no tin derecho’. E no ta dos ora liber pa bo ta cu bo yiu y tampoco e idea ta pa bo bay cas dos ora trempan, pasobra ban ta honesto un baby no ta keda colga dos ora largo na pecho, of bo tin cu haci'e di otro forma, manera meymey di trabao of algo asina”.
Minouche a agrega cu esaki ta pa e prome nuebe lunanan anto despues, e stabilidad ta asina grandi cu semper nos ta encurasha pa sikiera durante un lunch bo saca un biaha mas ainda, pa asina bo logra loke e Organizacion Mundial di Salud ta aconseha cu pa duna pecho alomenos dos aña of te ora e mucha mes stop di tuma lech'i pecho.
