Matanan den ciudad mester wordo trata como infrastructura esencial

Segun cientifico reciente:

ORANJESTAD (AAN):  Matanan den ciudad no mester wordo considera solamente un elemento decorativo, sino infrastructura esencial cu ta presta servicio tur dia pa comunidad. Esaki ta e principal conclusion di un estudio internacional publica den e revista cientifico PLOS Climate.

E investigacion, realisa pa mas cu 80 cientifico di 20 pais, ta propone un cambio fundamental den e manera cu ciudadnan ta maneha nan boskenan urbano. Segun e estudio, mata mester haya e mesun balor y proteccion cu otro infrastructuranan importante manera caminda, red electrico y sistema di awa.

E cientificonan ta destaca cu matanan den ciudad ta desempeña un papel crucial pa haci ciudadnan mas resistente contra e efecto di cambio climatico. Nan ta yuda baha temperatura den caya y plasanan publico, filtra contaminacion den aire, absorbe awa di yobida pa limita inundacion y contribui na un ambiente mas salu pa habitantenan.

Sinembargo, e estudio ta indica cu den hopi ciudad e matanan ainda ta wordo trata como decoracion cu por wordo reemplasa facilmente, sin un presupuesto fiho pa mantencion, sin suficiente proteccion legal y sin un plan di maneho pa largo plazo.

Investigadonan ta adverti cu ora un mata grandi muri of wordo corta, e beneficio cu el tabata ofrece no por wordo recupera rapidamente. Aunke planta arbol nobo ta importante, por tuma decenanan di aña prome cu nan por brinda e mesun sombra, enfriamento y otro servicio ambiental cu un mata madura.

Segun e investigacion, e reto lo bira ainda mas grandi den futuro. Pa aña 2050, casi shete di cada dies persona den mundo lo biba den ciudadnan, unda lo tin mas calor, menos espacio berde y un aumento di construccionnan di beton.

Pa e motibo ey, e autornan ta considera cu ta urgente fortalece leynan y politicanan cu ta proteha boskenan urbano. Nan ta enfatisa cu cada aña cu pasa sin proteccion efectivo ta nifica perde mas mata, un recurso natural cu no por wordo reemplasa di un dia pa otro.

E estudio ta conclui cu e pregunta awor no ta si matanan ta importante pa ciudadnan, sino si gobiernonan y comunidadnan ta dispuesto di reconoce nan como infrastructura esencial y inverti den nan proteccion pa enfrenta e desafionan di cambio climatico.