Dr. Roerdink:
ORANJESTAD (AAN): Recientemente Horacio Oduber Hospital a firma un acuerdo importante cu e compania Hulandes Matchis, relaciona cu donacion di stemcells, cu ta importante pa combati entre otro leukemia.
Durante un conferencia di prensa, director di hospital Jacco Vroegop a indica cu HOH ta bay traha duro riba un campaña pa stimula mas hende posibel pa bira donante di stemcells.
Oncologo-Hematologo Henk Roerdink tambe a hiba palabra y el a splica cu e team di Oncologo di HOH ta hopi contento cu e hospital a yega na e acuerdo cu Matchis.
“Mi no tin tempo ainda na Aruba, pero mi a haya algun pashent caba cu mi mester a manda pa exterior, debi na un enfermedad cu ta pone cu nan tabata tin mester di un transplante di stemcells”.
Mi ta hopi contento cu na final nos a logra di haya un donante di stemcell pa e pashentnan aki y esey ta refleha con importante ta pa haya suficiente hende cu kier pone nan mes disponibel pa haci un donacion di stemcells, pa asina nos por brinda bon tratamento na pashentnan cu nos ricibi akinan na HOH, segun Roerdink.
El a indica cu pa yuda haya mas donante disponibel, ta importante pa hendenan meld nan mes.
“No ta solamente ta importante pa e pashentnan na Aruba, pero famianan cu ta biba na Hulanda y otro partinan na mundo tin e necesidad pa haya un ‘match’ cu donantenan cu ta biba na Aruba, pasobra tur e material hereditario cu hende tin ta diferente na e material di por ehempel personanan di Europa, segun e Oncologo, kende ta haci un apelacion na tur hende pa bira donante di stem cells.
