Segun cifranan di Aeropuerto: *88% di e pasaheronan a wordo recupera compara cu 2019
ORANJESTAD (AAN)– Aruba Airport Authority N.V. (AAA) ta raporta riba e prestacion di AUA Airport den Augustus 2021; un otro luna di recuperacion fuerte compara cu e mesun periodo na 2019.
Na Augustus 2021, AUA Airport a procesa 99,093 pasahero cu a viaha for di Aruba. Esaki tabata 9% menos compara cu e luna anterior.
Durante e ultimo luna AUA Airport a recupera 88% di e cantidad di pasaheronan cu a viaha for di Aruba den e mesun luna na 2019. Na Augustus 2021 80,571 pasahero a viaha pa Merca, 9,302 pasahero a viaha pa Europa, 3,387 pasahero a viaha pa Antiyas Hulandes, y 5,833 pasahero a viaha pa Latino America.
Un averahe di e passenger load factor (PLF) na salida (cantidad di asiento ocupa en comparacion cu e cantidad total di asiento disponibel abordo di un avion na momento di sali for di AUA Airport) pa e mercado Mericano di 87% a keda raporta den Augustus 2021, mientras cu e averahe di PLF pa tur mercado tabata 86% durante e mesun temporada (comparando cu 2019 unda e PLF averahe pa tur mercado tabata 85%).
Durante e ultimo luna, AUA Airport a procesa un averahe di 29 buelo pa dia, esaki ta menos compara cu e averahe di 35 vuelo pa dia durante e mesun temporada den 2019.
Den e mesun temporada na 2020 AUA Airport a procesa solamente 218 vuelo mientras cu e frontera a habri na Juli 2020 pa tur operacion comercial.
https://diario.aw/categories/noticia/general/mas-di-99-mil-pasahero-a-viaha-for-di-aruba-den-luna-di-augustus-2021#sigProId8c74a889bd
