Minister Dangui Oduber ---- *weekend exitoso pa recuperacion di nos turismo
ORANJESTAD (AAN): Aruba ta mira otro weekend grandi tras di lomba unda cifra ta mustra cu mas di 9.000 turista a yega nos dushi isla. Riba diasabra a yega un total di 5.757 turista via nos aeropuerto di cual 5.144 tabata procedente di Merca.
Diadomingo tambe a mira un subida di yegada di turista unda a drenta Aruba 3.619 di cual 3.000 procedente di Merca. Minister di Turismo y Salud Publico Sr. Dangui Oduber ta satisfecho di mira un weekend caminda hopi turista a yega nos isla.
Merca ta keda Aruba su mercado di mas importante, pesey semper ta keda monitoria e ruta nan aki di cerca.
Gobierno a tuma e decision cu Aruba ta bolbe bek na normalidad y asina elimina tur restriccion contra e pandemia. Cu esaki kier focus pa Aruba su recuperacion di turismo pa asina recupera e economia y crea oportunidadnan cu pais Aruba tin mester di dje.
Un weekend cu hopi trabou pa nos taxista, tour operators, restaurantnan y tiendanan. Aruba ta recuperando y progresando, y tin tur confianza cu e aña 2022 ta e aña cu Aruba lo recupera turismo bek na e nivelnan di aña 2019.
E mandatario a subraya importancia di turismo como e driver principal di nos economia.
https://diario.aw/categories/noticia/general/mas-di-9-000-turista-a-yega-aruba#sigProIdf29e007102
