Mas di 80% di e pashentnan di Covid-19 tabata tin sobrepeso

Estudio haci na HOH durante e di 4 ola di Covid-19: --- *75% di e pashentnan no tabata vacuna 

ORANJESTAD (AAN):  Dr. Horacio Oduber Hospital a publica datonan relaciona cu e cifranan di comorbilidad (condicionnan of malesanan cronico pre-existente), obesidad y vacunacion den e pashentnan cu a wordo interna pa motibo di Covid-19 durante e di 4 ola (1 di Juli 2021 - 5 October 2021).

E malesanan cu a presenta den mayoria di casonan tabata obesidad, cancer, hipertension cronico, malesa di riñon, COPD, diabetes mellitus y malesa di curason.

E estudio ta conclui cu den e pashentnan cu Covid-19 na e momento di e di 4 ola na Aruba, tin, mescos cu durante e di 3 ola, a presenta comorbilidad.

Mas di 85% di e pashentnan tabata tin un of mas malesa cronico of pre-existente. E malesanan mas comun ta: sobrepeso (obesidad), hipertension y diabetes.

Mas di 80% di e pashentnan di Covid-19 tabata tin sobrepeso, desde "pre-obesidad" te hasta "obesidad morbido". 

VACUNA

Di e pashentnan inclui,  25% a wordo vacuna dos biaha y algun solamente un. E resto (75%) no tabata vacuna.

E number di comorbilidad pa pashent tabata levemente superior na e pashentnan vacuna cu den esnan no vacuna.

E pashentnan vacuna tabata tin dos of mas malesa cronico pre-existente, y entre esnan no vacuna e porcentahe tabata casi di 46%.

Den e pashentnan cu a fayece di Covid-19, e comorbilidad ta ainda mas comun.

Di e pashentnan cu a fayece relaciona cu Covid-19 solamente 5,4% no tabata tin ningun comorbilidad. 66% di e casonan tabata tin dos of mas comorbilidad. 

CAPACIDAD NA HOH 

E capacidad den ICU na HOH tabata insuficiente na e momento di e di 4 ola, principalmente debi na e falta di camanan. Como consecuencia, 39 pashent a wordo poni riba mashi (intuba) y traslada pa Colombia. 13 pashent a muri ayananí, 10 a "recupera" y a regresa  Aruba. E ayudo brinda pa Colombia ta wordo considera esencial. 

OBESIDAD: FACTOR PREDOMINANTE 

Por afirma cu obesidad, en particular, ta e factor di riesgo mas fuerte den loke ta e ingreso di pashentnan cu Covid-19. Ademas di e formacion y e nombramento economicamente viable di mas personal sanitario, ta necesario pone focus mas den e prevencion pa reduci e carga riba e capacidad y e empleadonan di HOH, como unico hospital na Aruba, pa reduci e carga den loke ta capacidad y riba e empleadonan na HOH.

E poblacion di pashentnan studia ta inclui 327 persona cu a ingresa cu Covid-19. E 327 admisionnan aki ta referi na 314 pashent unico; 301 pashent a wordo ingresa un vez durante e periodo di estudio y durante e periodo di estudio y 13 pashent tabata tin dos ingreso relaciona cu Covid-19 den e periodo di estudio.

Di e 314 pashent unico, 300 tabata residente na Aruba y 14 no residente (turista).