Minister Arthur Dowers, titular di Husticia:
- El a yuda 19 miyon Florin drenta caha di gobierno
ORANJESTAD (AAN) Minister di Husticia, mr. Arthur Dowers durante un conferencia di prensa e siman aki, a señala cu originalmente el a pensa cu nan lo a registra poco mas di cinco mil persona den e sistema “Hunto pa Progreso”.
“Pero, na e momento aki cu nos a haci nos prome analisis di data, ta duna indicacion cu nos a pasa e cinco mil aki. Nos mester haci ainda un analisis mas profundo di e informacion aki, pa por determina si tabata tin permisonan regular den esaki, of tur ta permisonan di Hunto pa Progreso”, Minister Dowers a indica.
E dignatario a sigui splica cu na momento cu e proceso di Hunto pa Progreso a cuminza, hopi mas persona a registra pa un permiso y diferente persona a paga p’esaki tambe.
El a señala cu ta bon pa indica cu a wordo analiza e tempo ey cu e proyecto aki a cuminza lo por a trece aden un suma di 10 miyon Florin. “Pero e prome calculo na e momento aki ta duna indicacion cu e lo a aden 19 miyon Florin di belasting adicional pa pueblo di Aruba.
Esaki, den cierto sentido, ta un bon noticia pasobra hopi di e hendenan cu tabata na Pais Aruba pa hopi tempo, di manera ilegal, no tabata duna ningun contribucion directo na caha di gobierno, hasta si nan mes kier a bira legal. Y ahora aki nos ta ricibi un suma cu aworaki lo mester bay transmiti su mes den mas placa di entrada pa Aruba, mas ora cu e personanan aki wordo registra den tur e otro sistemanan, cu mas placa di primanan lo por drenta tambe pa Pais Aruba”, e mandatario a subraya.
Minister Dowers a bisa cu ta importante pa gobierno a haci e proceso aki, pasobra un di e aspectonan cu el a ripara, ta cu tabata tin un situacion cu a bay for di man unda cu hopi hende a permanece ilegal, y e norma cu tabata tin antes ta cu ora bo kier a drenta Pais Aruba, mester a solicita y warda bo permiso pafo, cual den practica casi a wordo elimina, y gobierno a bisa cu e kier bay bek na esey. “Nos ta kere cu ta hopi importante pa un hende cu kier permanece na Aruba na un forma legal, haci su peticion y cana e camindanan regular pa cana, y warda e decision di gobierno na momento cu e kier entrada akinan”, e titular di Husticia a remarca.
