Segun Rubiella Toppenberg di FADA:
ORANJESTAD (AAN): Aña a habri cu diferente incidente serio y lamentable den trafico, y hopi di nan relaciona cu uzo iresponsabel di alcohol. E desaroyonan aki ta hopi preocupante y ta mustra claramente e necesidad pa mas conscientisacion, responsabilidad y control pa garantisa siguridad riba nos careteranan.
Segun señora Rubiella Toppenberg di Fada, aña 2025 a cera cu cifranan hopi halto relaciona cu maneho di auto bou di influencia di alcohol y 2026 a habri cu incidentenan den trafico cu ta indica cu a cuminsa cu e mesun rumbo aki.
Señora Toppenberg a remarca cu un di e preocupacion di mas grandi di Fada ta e leynan di Aruba y ta sinti cu Fada falta e refuerso aki pa sigui cu nan campañanan di conscientisacion contra e problema aki. “Nos por sigui cu campañanan di ‘Don’t drink and Drive”, pero na momento cu no tin e parti unda cu hende ta haya boet of castigo pa esaki, nos ta sinti cu ey tin e mancamento cu ta pone cu e campañanan no ta coy e forsa manera mester ta”, señora Toppenberg a bisa.
E campañanan di conscientisacion, porehember Bo Amigo Responsabel (BAR), segun señora Toppenberg, ta bon y ta necesario. Hopi hende ta sigui e informacionnan di e campañanan y ta tuma bon decision, incluyendo hopi hende di e generacion young ta tuma e decision di uza BAR. KPA tambe ta trahando duro riba e campaña aki. E conscientisacion ta eyfo presente. Loke falta ta e refuerso di leynan cu ta duna mas castigo cu dos dia pa incidentenan causa bou influencia di alcohol.
Di parti di Fada, señora Toppenberg a enfatisa, den 2026 lo bay traha pa yega na esnan cu tin poder pa cambia leynan. Segun e, tanten cu nos leynan ta keda hopi swak pa loke ta castigo ora un hende maneha bou di influencia, campañanan, pa con bon cu nan ta, no ta logra haya e forsa manera mester ta.
