Mas di 200 proyecto hayando un touch-up enorme e weekend aki cu Aruba Doet

ORANJESTAD (AAN): Diabierna mainta na Centro di Famia Piedra Plat a tuma lugar e kick-off di e actividadnan di weekend di Aruba Doet 2022.  Esaki ta e di diez aña cu e actividad aki ta tuma lugar na Aruba.

   Den diez aña di tempo, Aruba Doet a yuda duna un imagen nobo na mas di 1.600 proyecto, y tambe mas di 1.5 miyon Florin a wordo financia pa Oranje Fonds pa proyectonan.

   Na 2012 a bishita e proyecto “Bon Doet” na Bonaire.  Na Hulanda e proyecto di NL Doet ta esun cu a start e movimento aki.  Cada aña NL Doet ta haya bishita di Rey y Reina.   Na Bonaire a keda asombra con formidable e “Bon Doet” ta funciona, y asina a bin bek y na 2013 a start cu e prome ‘Aruba Doet’.

   Un biaha mas awor na 2022, Aruba ta brazando e proyecto di Aruba Doet.  E fin di siman aki lo tin como 3.000 boluntario trahando riba 200 proyecto riba e isla, pues tur hende lo ta man na obra pa haci un diferencia grandi den un solo weekend.  E organizadornan di Aruba Doet ta hopi contento y orguyoso cu Aruba ta asina hopi envolvi den dje.

   Aruba Doet a bira un acontecimento asina conoci, cu ya ta hopi organizacion local, e.o. Centronan di Bario, etc., di trempan ta inclui Aruba Doet den nan programa di aña.

   Esaki no ta bay sin e motivacion di tur organizacion, sin e motivacion di cada persona cu ta haci e diferencia.  Sin lubida e cantidad grandi di compania na Aruba cu ta ofrece descuento, material, y ta duna dianan liber na empleadonan pa bay duna un man durante Aruba Doet.  Varios organizacion y gobierno tambe a duna espacio pa funcionarionan bay duna un man cu tur nan equipo den Aruba Doet.

   Aruba Doet ta agradecido na Gobernador cu anualmente ta presente  na e apertura, y ta duna palabra pa encurasha e organizadornan pa sigui y apoya cu e trabao boluntario na Aruba.  Sin boluntario, ningun organizacion na Aruba por ta unda nan ta awe.

   Tambe nan ta gradici Oranje Fonds cu ta leu di Aruba, pero ta haci un impacto grandi y cada aña ta duna un chens pa haci esaki.

   Un palabra di exito ta bay na tur boluntario cu den fin di siman ta yudando pa haci Aruba haya un cara diferente.