Mas cu mitar di e kehonan a haya un trato den prome mita di 2026

Ombudsman di Aruba:

ORANJESTAD (AAN):  "Bo no ta bo so." Cu e mensahe aki, Ombudsman di Aruba a presenta e resultadonan principal di su trabou durante e prome seis luna di 2026. E cifranan ta mustra cu hopi ciudadano a sigui busca e institucion pa apoyo ora nan confronta problema cu instancia gubernamental, y cu den mas cu mitar di tur caso ricibi, un forma di intervencion of solucion a logra wordo realiza.

Durante e periodo di januari te cu juni 2026, Ombudsman di Aruba a ricibi 144 peticion, pregunta y keho di pueblo. Di tur e kehonan ricibi, 53.3% a haya un trato durante e prome mita di aña. E resultado aki ta confirma cu un cantidad significativo di ciudadano a haya apoyo of progreso den nan caso. 

Diferente forma di trata kehonan

Den e periodo aki, Ombudsman a maneha e kehonan pa medio di diferente instrumento legal y administrativo:

14 investigacion formal.

14 intervencion informal.

23 otro tipo di maneho.

9 caso cu ainda no tabata determina na momento di e evaluacion.

Ademas, durante e periodo di 1 te cu 5 di juli 2026, Ombudsman a emiti:

4 Carta di Atencion;

3 Carta di Preocupacion;

1 Investigacion; y

1 Rapport. 

Motibonan principal pa presenta un keho 

Segun e cifranan, e razon mas comun pa ciudadano acudi na Ombudsman ta cu instancianan no ta responde na nan peticion of comunicacion. E categoria aki representa 27 caso, convirtiendo e den e problema mas frecuente. 

Otro motibonan importante ta: 

7 caso relaciona cu disponibilidad y accesibilidad di servicio;

7 caso unda e instancia no a aplica e maneho corecto;

6 caso di trato inapropia;

4 caso unda e servicio brinda no tabata adecua;

3 caso relaciona cu situacion di detencion; y

2 caso relaciona cu falta di supervision, mantencion di ley of limitacion den ehecucion. 

Efecto concreto pa ciudadano 

Entre e resultadonan mas notable ta cu: 2 caso a wordo cera pasobra e keho no tabata contra un instancia cu ta cay bou di competencia legal di Ombudsman.

Den 2 otro caso, despues di intervencion di Ombudsman, e instancia corespondiente a decide reevalua su decision, teniendo cuenta cu e keho presenta pa e ciudadano. 

Un institucion pa proteha bon gobernansa 

Ombudsman di Aruba enfatisa cu e cifranan no ta solamente estatistica, sino nan ta representa hende cu a haya obstaculo den nan contacto cu gobierno y cu a busca un solucion imparcial. E institucion ta sigui traha pa promove bon gobernansa, transparencia, trato husto y respeto pa derechonan di ciudadano.