ORANJESTAD (AAN): Durante e forum tocante e vacuna cu Departamento di Salud a organisa hunto cu Telearuba a sali na cla cu si wak e casonan na Aruba for di luna di Mei,
tabata tin mas cu 100 hende ingresa pa Covid, y 2% of 3% so tabata vacuna. Kiermen cu 97% di esnan cu ta interna den Hospital awo nan tey pasobra nan no a vacuna.
Dr. Caroline Becker, specialista di pulmon na r. Horacio Oduber Hospital a confirma esaki bisando cu nan a constata cu di Mei pa awo mas cu 90% di e pashentnan cu ta interna na Hospital pa motibo di Covid-19 no a vacuna of a haya e prome dosis so, un porcentahe chikito ta personanan cu tin un malesa adicional cu ta haci cu e vacuna ta menos efectivo. Sea problema immunologico of cu ta tuma un remedi cu ta baha su sistema immune.
No obstante, Dr. Becker a subraya cu ta recomendable pa hendenan cu tin malesa cronico of problema immunologico vacuna pasobra aunke un tiki menos, e vacuna ta proteha nan tambe. E excepcion ta ora un persona a haya un alergia hopi grave door di un vacuna similar na esun di Covid-19. Pero mayoria di hende por tuma nan vacuna.
E ta sugeri personanan cu tin duda pa no keda cune, pero yama nan docter di cas of DVG pa haya contesta y probablemente nan ta bay wordo recomenda pa vacuna.
