Segun Consul di Colombia na Aruba, Gustavo Serrano Amaya:
ORANJESTAD (AAN): Segun Consul di Colombia na Aruba, Gustavo Serrano Amaya, e proseso di regularisacion implementa door di Gobierno di Aruba a beneficia miles di ciudadano Colombiano cu awo por biba y traha legalmente na e isla.
Den un entrevista cu DIARIO, Serrano Amaya a indica cu, segun informacion suministra door di DIMAS, durante aña pasa aproximadamente 4.500 Colombiano a regularisa nan situacion migratorio. Durante e aña aki, otro 500 persona a haya permiso pa prome biaha.
“Nos ta papia di mas o menos 5.000 Colombiano cu a logra regularisa nan situacion y a haya permiso pa prome biaha,” e consul a splica.
Segun Serrano Amaya, e siguiente paso pa e grupo aki ta inscribi den e censo oficial, loke lo permiti nan haya acceso na servicionan di AZV. El a destaca cu e cobertura di salud ta un di e beneficionan mas importante cu ta resulta for di e regularisacion.
Riba e pregunta si ainda tin Colombiano cu mester regularisa nan situacion, e consul a confirma cu ainda tin algun caso pendiente. El a splica cu algun ciudadano a yega Aruba durante e di dos mita di aña pasa, despues cu e proceso special di regularisacion a cera, mientras cu otro no a logra cumpli cu e proceso pa diferente motibo.
Aunke Serrano Amaya a señala cu e cantidad di personanan den e situacion aki ta considerablemente menos cu den añanan anterior, el a reconoce cu ainda tin algun Colombiano cu ta busca un solucion pa nan status migratorio na Aruba.
E consul a remarca cu no tur caso lo por wordo resolvi faborablemente. Segun e, algun persona posiblemente lo mester sali for di Aruba pasobra nan lo no por cualifica pa un permiso di residencia of trabao bou di e reglamentacion actual.
E declaracionnan ta mustra cu, apesar di e resultado positivo di e proseso di regularisacion, ainda tin un grupo chikito di migrantenan Colombiano cu ta enfrenta incertidumbre tocante nan futuro legal na Aruba.
