Mas cu 450 vehiculo a pasa den prome edicion di “Baki den Bario” pa 2026

Gran participacion di comunidad

ORANJESTAD (AAN): Bon tempran diasabra mainta, desde 6:00 di mainta, ya tabatin un rij largo di vehiculo den area di Tanki Leendert pa haci uso di e servicio di “Baki den Bario”, iniciativa di gobierno lidera door di Prome Minister Mike Eman pa facilita ciudadano, e oportunidad pa deposita sushi/ desperdicio den un manera organisa.

E participacion tabata notabel. Mas cu 450 vehiculo a pasa durante e mainta pa entrega material y desperdicio. En total a haci uzo di 42 baki di Ecotech y 18 baki di Serlimar, cu a permiti cu e operacion a cana eficientemente.

E accion aki, realisa danki na colaboracion estrecho di diferente instancia y partner, entre nan Carentra, DOW, City Inspector, Serlimar y Ecotech, hunto cu ploegnan di City Inspector encarga cu mantencion di limpiesa y e boluntarionan cu ta contribui pa haci e union entre comunidad y gobierno cada biaha mas fuerte.

Segun Prome Minister Mike Eman, e participacion activo di comunidad ta mustra cu iniciativa manera Baki den Bario ta responde na un necesidad real den e barionan di Aruba. E accion ta forma parti di un esfuerso continuo pa mantene Aruba limpi mientras gobierno ta traha cerca di ciudadano.

Un palabra special di gradicimento a wordo expresa na tur esnan cu a contribui na e prome edicion di Baki den Bario pa 2026, incluyendo e trahadonan di diferente departamento, partnernan priva y tur ciudadano cu a presenta bon tempran pa sostene e iniciativa aki.

Cu participacion manera esaki, gobierno ta reafirma su compromiso pa sigui fortalece e colaboracion cu comunidad y sigura cu iniciativa manera Baki den Bario ta continua como un instrumento efectivo pa mantene nos isla limpi.