Como destinacion turistico calidad di caretera Aruba ta importante
*Awor Aruba mester paga pa mal maneho infrastructura cu 1.6 Biyon
*Gabinete Wever-Croes ta pidi asistencia internacional pa careteranan
ORANJESTAD (AAN) — Uno di e temanan cu DIARIO a presenta na Aruba, tabata cu mester atende cu asfalt cu ta un producto petrolero cu resultado pa medio ambiente.
Pa loke tabata parce algo normal na Aruba, bira un punto importante di atencion, mester bolbe na 1990 ora alarma internacional a wordo bati pa e seriedad di cambio di clima.
Na 2009, ora e promesa politico di Mike Eman pa baha BBO cu mitar a permiti e politico gana eleccion, el a uza e ansiedad internacional pa enfrenta cambio di clima pa bini cu su pretencioso programa berde cu ta e color di naturalesa pero tambe di su partido.
Mientras mundo a sigui progresa, mas y mas Aruba a tuma nota con e “go green”di gobierno Mike Eman hasta a inclui atraccion di un compania pa reactiva e instalacionnan bieu di Lago cu placa di Nicolas Maduro cu actualmente ta wordo acusa di abuso contra medio ambiente y bienestar di hende cu e forma cu e ta atende cu petroleo cu ta destrui laman y costa Venezolano.
Mike Eman tabata dirigi e gobierno cu a introduci e plan di Bo Aruba cu a nifica cu un suma di 1.6 Biyon Florin, cu Aruba no tabata tin, lo a wordo gasta sin cu ni Parlamento por a interveni.
E rapport “Bo Aruba” a trapa riba asunto fundamental di bon gobernacion y awe ta sigui entrega prueba di e abuso cu a wordo comete contra Aruba na e momento cu e pais mester a prepara su mes pa direccionnan nobo a base di cambio di clima.
Parti di e plannan cu Mike Eman cu a alcansa cu na urna electoral na 2009 mayoria di Aruba a “go green”pa su persona por a bira Prome Ministro, tabata pa uza e suma di 350 Miyon na caretera cu proyectonan manera Green Corridor.
E proyecto pa careteranan di Aruba no a tene cuenta cu “Go Green”pasobra e producto petrolero “asfalt”mester a cubri espacio enorme di Aruba.
Den un rapport cu Algemene Rekenkamer di Aruba a presenta, gobierno di Mike Eman a wordo acusa di kier a uza mas cu 350 Miyon Florin na 74 proyecto pa amplia e red di caretera di Aruba.
Uno di e acusacionnan grandi di e controlador di placa di Aruba, Algemene Rekenkamer Aruba tabata, e falta di planificacion riba termino largo y e forma cu ta cubri gastonan cu a wordo pone riba lomba di Pueblo.
Gobierno Mike Eman no por bisa cu e no tabata na haltura di cambio di clima ora el a cubri Aruba cu asfalt pa careteranan mal construi cu ta permiti yobida crea piscinanan pa personanan cu ta trafica riba e careteranan.
Estado di careteranan di Aruba ta sumamente importante pa economia di Aruba, cu ta depende di turismo.
Na e momentonan cu Aruba mester prepara pa gastonan grandi cu cambio di clima lo nifica pa comunidad y pa cada Arubiano, informacion ta drenta cu Prome Ministro Evelyn Wever-Croes durante e reunionnan cu e tabata tin den seno di Nacionnan Uni, a habri un caminda pa yega na un solucion pa e red di comunicacion di trafico, trafico, na tera na Aruba cu ta den mal estado.
Informantenan ta considera cu Parlamento, cu den su constelacion cu mayoria di AVP entre 2009 pa 2017 a permiti Mike Eman hiba un maneho financiero descabeya, awor mester splica pakico a pesar di e sumanan enorme cu Aruba a gasta, e careteranan di Aruba ta den mal estado.
Parlamento awor mester bolbe na e Rapport Bo Aruba, cu a presenta loke awe ta wordo confirma dor di Prome Ministro Evelyn Wever-Croes, pa splica estado di e careteranan na Aruba.
E fayo di un plan consistente pa mantene e careteranan di Aruba cu a bini dilanti den e rapport di Algemene Rekenkamer Aruba, ta haci cu Aruba mester busca asistencia financiero nobo mas ainda pasobra e pandemia Covid-19 no a permiti Gobierno uza loke el a aloca pa mantene caretera, cu ta parti importante di infrastructura di Aruba, cu mester a tene na consideracion loke cambio di clima lo a exigi.
Condicionnan di clima cu a cambia, manera otro articulo di DIARIO lo ilustra, ta afecta careteranan segun informacionnan di Gobierno Wever-Croes na medionan di comunicacion.
Global Island Partnership a priminti yudansa pa realisa e proyectonan.
Mientrastanto pa DIARIO ta keda importante pa sigui vigila e desaroyonan debi na exigencianan cu cambio di clima lo impone riba careteranan cu segun por comprende lo conoce un plan di diez aña pa nan mantencion y mester cumpli cu e exigencianan nobo enfrente cambio di clima.
