Minister Glenbert Croes: Segun cifra di encuesta laboral
ORANJESTAD (AAN) — Den conferencia di prensa gubernamental, Dialuna, Minister Glenbert Croes, titular di Labor, Energia y Integracion, a sigui mustra pa medio di grafico e participacion di pueblo den e mercado laboral, cu segun e mandatario obviamente ta corobora e recuperacion laboral, economico y en general di nos pais.
E cifra ta mustra cu e mercado laboral a subi di 60.1 pa 60.7% activo. Na 2021 cu tur hende a cuminza bek na trabao, e tabata pa un rato na 61.3% pero e trend ta cu e ta sigui subi y tur hende ta trahando.
E cifranan di e cantidad di hendenan cu ta inactivo riba mercado laboral, entre nan studiante, pensionado, y por ta hendenan cu no tin interes di subi e mercado laboral. Un total di 35.156 persona ta cay den e categoria di inactivo.
Esaki ta un cifra pa traha riba dje y motiva e hendenan inactivo pa drenta den e mercado laboral, e dignatario a bisa. “Pasobra tanten cu tin desempleo, apesar cu e tabahando drasticamente y cu nos ta den e record low di 4.3% pa e ultimo dos decadanan, ainda tin desempleo pa locual nos kier traha pa pone tur hende bek na trabao”, Minister Glenbert Croes a señala.
E mandatario a referi tambe na e cifra di desempleo pa hobennan. E porcentahe aki tambe ta yega hopi abao; prome cu pandemia tabata 16%, el a subi te na 25.9% cu ta altisimo, pero el a baha aworaki te na 9.9%, cu ainda ta halto pero e ta bahando.
“Pero alavez e hobennan cu no ta emplea, no ta den educacion, no ta den training, ta subiendo di 6,9% pa 7.4%, cu ta mesun nivel cu na 2021. Esaki ta categoria di hoben cu mester di nos atencion, cu por ta vulnerable. Mester empodera, motiva nan, wak unda nan ta, gara nan man tene, hinca nan den diferente curso. Enseñanza pa Empleo ta un di e instrumentnan cu tin pa nan por haya trabao, pero trabao di calidad tambe” e mandatario indica.
Minister Croes a agrega cu lo mas importante di tur esaki ta cu esaki ta cifranan di 2022 y nos ta na 2023 y e por participa na nos comunidad ta cu e ultimo monitoreo na Juli ultimo, ta mustra cu e trend positivo aki ta continuando.
“Esaki ta resultado di e encuesta di labor, di Aruba su recuperacion economico, laboral y general pa 2022, pero pa 2023 e indicadornan ta mustra cu e trend positivo aki ta continuando y esaki ta un bon señal pa nos”, Minister Glenbert Croes a subraya.
