ORANJESTAD (AAN): Desde prome di September, 2023, señora Amalin Flanegin ta eherce e funcion como Procurador General nobo pa Aruba.
Esaki ta algo cu Aruba por ta hopi orguyoso di dje pasobra esaki ta prome biaha cu e funcion aki ta worde ocupa pa un hende muhe Arubiano. Señora Flanegin tin un trayectoria largo di funcionnan di maneho na Aruba.
Desde prome di maart, 2012, señora Flanegin ta eherce e posicion di Division Manager Supervision and Enforcement and Advisor pa e Comite Ehecutivo di Banco Central di Aruba (CBA) y ta na encargo di diferente departamento di CBA.
For di 2007 pa 2011, señora Flanegin a traha como abogado na Juridische Praktijk Mr. A.Flanegin N.V. den e temporada aki, señora Flanegin tabata activo den areanan legal, un NMI mediator y tabata duna lectura na Universidad di Aruba y tambe a duna trainingnan riba proceduranan di AML/CFT na banconan local.
Entre 2002 pa juni 2007, señora Flanegin a eherce su funcion na Ministerio Publico di Aruba na unda cu el a dirigi varios investigacion criminal entre otro di abduccion, ladronicia, asesinato, fraude y labamento di placa. Tambe, señora Flanegin tabata encarga cu investigacionnan militar, di Coast Guard, di Financial Investigacion Unit di Cuerpo Policial di Aruba (BFO) y MOT, cu awo a bira FIU-Aruba.
Entre 1996-2002, señora Flanegin tabata e Director di MOT y su tarea principal tabata pa set up e departamento completamente. For di 1994 pa 1996, señora Flanegin tabata Oficial Hudicial den formacion den Corte di Husticia. Di 1992 pa 1994, Señora Flanegin tabata Secretaria Adhunta di Raad van Advies. Di 1987 pa 1992, señora Flanegin tabata abogado legislativo na Departamento di Legislacion y Asunto Huridico (Directie Wetgeving en Juridische Zaken, DWJZ).
Señora Amalin Flanegin, despues di a caba su estudio na Colegio Arubano, VWO (1974-1980), a obtene su ‘kandidaats bul’, ‘Bachelor’s Degree’ na Universidad di Antia Hulandes na Augustus 1982, (1980-1982). Despues na Leiden State University na Hulanda, (1982-1986), señora Flanegin a obtene su ‘doctoraal bul’, ‘Master’s Degree’, december, 1986. Na juni 1987, señora Flanegin a obtene na Leiden State Universitiy, su ‘Notorial Law, Candidate Notary, ’Doctoral bul’, Master’s Degree (1985-1987). Na 2022, señora Flanegin a bira un Certified Anti-Money Laundering Specialist.
Prome Minister Evelyn Wever-Croes, den nomber di Gobierno di Aruba ta felicita señora Amalin Flanegin pa e funcion nobo di sirbi nos pais y ta desee hopi exito den su funcion nobo como Procurador General pa nos pais.
