Mary Joan Foundation lo bira parti di “One Healthy Day” Diadomingo 20 di Maart

ORANJESTAD (AAN) – Arabella Reyes-Colina, Presidente di Mary Joan Foundation, a confirma pa comunidad di Aruba, cu e fundacion ta bay ta bay ta parti di “One Healthy Day”, cu lo tuma lugar diadomingo 20 di Maart na Cas di Cultura.

Reyes-Colina a menciona cu Mary Joan Foundation ta bay tin un tent pafo na Cas di Cultura, pa duna informacion di nan servicionan, y salud di pecho cu ta importante.

Pero fuera di nan tent di informacion ta bay tin den e “Edu-campus” mes, e fundacion ta bay tin un local unda docternan, na un forma boluntario, siña e persona cual ta e manera corecto di examina su pecho.

Señora Reyes-Colina a subraya cu salud di pecho ta den e man di cada persona mes, loke e ta wak y fula. Pero si no sa e manera corecto di haci esaki, tampoco ta bon.

Esaki ta un oportunidad hopi importante pa haci uso di dje, tanto hende muher como hende homber, y e ta haci un invitacion na un tur pa bin busca informacion durante e “One Healthy Day” y wak e manera corecto di practica e auto-control di pechonan.

E dama a agrega cu Mary Joan Foundation tambe ta bay cu e normal nobo, pero tambe lo sigui concientiza manera semper, y nan ta bezig cu actividadnan pa nan clientenan na Aruba Doet, siman pasa, y nan a pasa hopi contento; despues di dos aña, tabata tin un grupo grandi bek cu por a disfruta di otro y haci cosnan leuk conhuntamente.

Señora Reyes-Colina a informa cu nan ta preparando caba pa October proximo, cu poder di Dios. Nan lo tin e caminata, e colect tur diasabra, y lo bay tin nan mercado di salud. Nan ta keda activo pa nan clientenan y tambe pa comunidad. Mary Joan Foundation ta considera nan mes un fundacion hopi necesario pa comunidad, señora Reyes-Colina a expresa.