Mary Droogh escogi como VOTY di Women’s Club of Aruba pa 2022

ORANJESTAD (AAN): E aña aki ta e di cinco aña cu CEDE Aruba a otorga su Voty-Award. Voty ta para pa Volunteer Of The Year,

cu ta e premio pa e boluntario di aña y asina duna reconocimento na e trabao di organizacionnan cu ta dedica nan mes na trabao di boluntario.

   Tur organizacion cu ta registra den Community Guide tin e oportunidad di scoge y manda nomber di su Boluntario di Aña. E persona aki mester ta un boluntario cu a duna un contribucion special na su organizacion y ta haci un diferencia den comunidad.

   E nominado di cada organizacion lo haya un galardon durante un evento special y esaki ta e VOTY-Award. Pa e Voty-Award di e aña aki, Women’s Club of Aruba (WCA) a scoge Mary Droogh como Boluntario di Aña.

   Na 1984, Mary a bira miembro di WCA y ta un boluntario hopi activo, ora ta referi na su pasion pa entretene nos grandinan na Paviljoen di San Pedro na Playa.

   El a dedica hopi aña ta hunga bingo cu nan y pasa tempo valioso cu nan.

Mary ta e persona di importancia pa yuda maneha e finansa di e diferente proyectonan pa recauda fondo pa club. Un di e proyectonan cu Mary ta gusta masha ta Student Awards. Como un maestra cu pensioen, e ta gusta tuma contacto cu e miho graduadonan di Aruba pa cu e anochi cu club a scoge pa honra nan.

   Desde cu Mary a bira miembro, el a traha mas tanto cu Comision di Welfare pa yuda nos grandinan y entretene nan.

   Tambe el a traha den Comision di Ways & Means pa yuda organiza actividadnan pa recauda fondo cual ta bay back den nos comunidad, Comision di Study Group door di duna diferente curso y yuda grandemente cu Christmas Bazaar, Comision di Dress a Child pa yuda bisti nos muchanan menos afortuna, Comision di Medio Ambiente cu enfoke riba nos naturalesa y na 1989 e tabata chairman di Comision di Student Awards. Pa loke ta directiva, na varios ocasion el a asumi e encargo di Member at Large cu ta Miembro en General.

   Durante reunion general di miembrecia pa luna di februari ultimo cu tabata dedica na Amor, presidente Norma Brinkenberg na nomber di directiva a felicita Mary y Bernadette Schouten, miembro di comision di miembrecia, na nomber di tur miembro tambe a felicita Mary un biaha mas pa su premio bon mereci.

Mary, WCA ta yama bo danki pa tur e añanan di dedicacion como boluntario y ta felicita bo masha cu e logro aki. Pabien, Mary!

   E potretnan aki pa cortesia di Emperatriz Perdomo.