Como Presidente di IOCaribe:
ORANJESTAD (AAN)—Den entrevista cu DIARIO, señor Mark Oduber, ken actualmente ta fungi como e Experto den Ciencia pa UNESCO Aruba, recientemente tabata na Francia pa participa den e Conferencia grandi Oceanografico, cual Asamblea General a tuma lugar na Paris.
Oduber a menciona cu cada dos aña e Asamblea General ta tuma lugar, y cada pais miembro mester tuma decision riba diferente tema y den e Asamblea aki nan a dicidi pa e presupuesto pa e programanan por wordo implementa.
Mark a comenta cu Aruba ta un miembro asocia di Unesco, pero den e parti di IOC nos Isla ta miembro. Esey ta cay bao di capa di Reinado Hulandes, y el a bay como Presidente di e Directiva di IOCaribe cu ta e seccion regional pa e parti oceanografico di Unesco, cu ta cubri Merca te cu Brasil.
Mark Oduber a splica cu e Comision intergubernamental oceanografico di Unesco ta pa recarga Ciencia Oceanico, den e decada di oceano manera nos ta aden, actualmente, y particularmente den e ciencia oceanico esey ta nan tarea principal pa Nacionnan Uni.
“Pa Aruba mi ta mire como un hopi bon ‘win-win’ situacion y un bon oportunidad pa intercambia idea cu nos partnernan di Reino, anto eynan a bin adelanta cu Hulanda y mi pensamento tambe, y e pensamento di IOCaribe pa mas colaboracion y pa nos funciona mas como un Reino (Hulanda cu su paisnan) unda tambe lo mi sigui cu combersacion cu e otro partinan di Reino, principalmente Hulanda pa nos haci uso di Hulanda, pasobra con cu bay bin e ta mucho mas desaroya cu nos den e parti di investigacion”, Mark Oduber a señala.
El a agrega cu Hulanda tin hopi mas universidad y mas fondo cu un Isla chikito. Oduber a menciona cu Hulanda tabata hopi interesa pa drenta den IODC pa ta mas activo y drenta den e parti Caribense.
“Y mirando e oportunidad cu ami actualmente ta e presidente di e board di IOCaribe, e ta un bon oportunidad pa nan y pa mi tambe. Tur pais den e region ta suppose di bin cu un Comision di e Decada Oceanico, cu lo wak si e pais ta bezig ta duna siguimento na tur loke e decada oceanico a trece dilanti, y ki nos kier logra pa 2030 pa wak si e pais ta volg”.
Oduber a bisa cu loke nan a ripara ta paisnan grandi manera Merca, Mexico, Brasil, Colombia tin nan Comision, y Venezuela ta hopi activo pa bin cu su Comision tambe.
Pero e Islanan individual, esnan Hulandes y Ingles, tin falta di e Comision aki y ta dificil pa islanan chikito bin cune. “Nos ta compronde esey, y e ora ey IOCaribe a bin cu e idea di bin cu un Comision general pa e islanan chikito y nos recomendacion ta pa laga Hulanda bin cu su Comision y laga esaki cubri tur e Islanan”, Mark Oduber a relata.
