Marion Maduro hopi orguyoso di e produccion nobo di “Cariño” di Chicas Gaiteras

ORANJESTAD (AAN) – Den un anochi di reencuentro,  hopi bunita y emocional, cu presentacion di un video clip, Chicas Gaiteras, despues di 32 aña largo, a bolbe presenta nan cantica “Cariño”, den Paseo Herencia.

Marion Maduro, den un entrevista cu DIARIO a conta cu despues di 32 aña, atrobe e produccion ta riba mercado interpreta pa diferente artista, nos mes hendenan Arubiano, manera Robert Jeando’r, Robert Maduro, Maybelline Arends-Croes.

“Mi ta kere cu tur hende a disfruta y ami mes hopi orguyoso di mi muchanan y Chicas, pero tambe orguyoso di e produccion aki cu a keda hopi bunita”, Marion a expresa.

El a splica cu e produccion a wordo poni riba facebook di Chicas Gaiteras mes, pero ta bay trece pa un publico mas grandi tambe por disfruta di dje.

Marion a subraya cu awo mas cu nunca na Aruba, nos mester di cariño. El a bisa cu mirando tur e desaroyonan di nos mundo, ultimo temponan, “y si nos mes no ta transmiti e paz, ken ta hacie pa nos? Y mi ta kere cu no tin miho palabra pa bisa cu “cariño”, Marion Maduro a expresa.