ORANJESTAD (AA): Comandante di Mariniers Kazerne Tim Van Wijk ta haci un yamada na muchanan muher pa inscribi pa e programa di Formacion Social,
cu ta bay cuminza e zomer aki y den un entrevista el a bisa cu tin mester di mas mucha muher.
El a splica cu aña pasa tabata tin e prome trayecto di Formacion Social pa hende muher, mientras cu pa hende homber durante ultimo 15 añanan tabata tin un trayecto y cu hopi exito.
“Cerca e damanan nos por a wak cu e ultimo trayecto tambe tabata uno exitoso y nos kier haci esaki atrobe, pasobra e damanan di Aruba merece esaki”, segun van Wijk .
Locual Savaneta Kamp ta ofrece den e trayecto aki ta siña kico ta disciplina, siña kico ta mantene bo mes na palabracionnan, yega na tempo y siña di ta confiable pa por mantene un mihor manera di biba.
Van Wijk a indica cu esaki ta un tremendo oportunidad pa muchanan muher y damanan hoben gara cu dos man, pasobra nan ta siña bon con pa mantene bo mes na palabracionnan y cu esaki den bida real bo ta bay tin bon herment pa ta exitoso.
