ORANJESTAD (AAN) – Minister Presidente, Evelyn Wever Croes, den conferencia di prensa di Dialuna,
a bisa cu un tema cu riba e aspecto financiero semper ta haya hopi atencion, ta e tema di personal di gobierno. Tambe, seguidamente, el a referi na e tema di infrastructura y desaroyo.
E mandatario a menciona cu aworaki por mira cu e personal di gobierno ta trahando cu mas eficiencia, logrando hisa e eficiencia cu tin den e aparato gubernamental.
LAND ARUBA ACADEMY:
“Y, casualmente, a caba di lanza ‘Land Aruba Academy’ cu ta riba e website di Departamento di Recurso Humano, unda tur empleado publico por sigui diferente curso y training, gratuitamente, pa nan por amplia nan conocemento y por ta mas eficiente y efectivo den nan trabao”, Minister Presidente a señala.
El a agrega cu esaki ta un website cu training y cursonan online, cu ta duna e empleadonan publico hasta certificado y por yuda nan no solamente na amplia nan conocemento, pero tambe den nan carera den Gobierno.
ENFASIS RIBA DESAROYO:
Prome Minister a subraya cu aworaki, den e fase di recuperacion, e enfasis di gobierno ta riba desaroyo.
“Nos tin cu desaroya nos pais di tal forma cu ta busca e balansa entre mantencion di nos naturaleza, di nos medio ambiente, y desaroyo cu ta crea mas cupo di empleo”, e mandatario a bisa y pesey, seguidamente a papia tocante infrastructura, cu ta un ministerio cu ta cay bao Minister Presidente su responsabilidad.
Den e cuadro aki, e mandatario a indica, hopi importante ta e ley di ROPV cu keda aproba algun tempo pasa, y cu hustamente ta delinea con pa trece balansa entre desaroyo y con pa cuida Aruba su naturaleza y su medio ambiente.
“Y den e ley aki di ROPV cu a cana full su caminda, cu tur hende por a trece nan obhecionnan dilanti, a wordo teni cuenta cu loke por tene cuenta cune, y finalmente e ta hancra den Ley”, e mandatario a remarca.
El a agrega cu eyden ta stipula kico ta e areanan cu por haya desaroyo y kico ta esnan cu no por haya desaroyo. “Y nos como gobierno ta tene nos mes na dje, y zorg pa tin desaroyo den e areanan cu si por traha un desaroyo”, Premier Wever-Croes a expresa.
