Mariniernan di Merca y Hulanda cu training na Aruba

ORANJESTAD (AAN): Mariniernan Mericano ta bin tene ehercicionan na Aruba. Riba 13 di juni e training ‘Caribbean Coastal Warrior 2022’ ta cuminsa.

Durante e ehercicio cu ta keda bin bek tur aña, Mariniernan di ‘United States Marine Corps’ Cuerpo di Marina di Merca, ta train hunto cu Mariniernan di Hulanda di e ‘Marine Squadron Carib’. E ehercicio ta dura un par di siman.

            E colaboracion militar entre Merca y Hulanda ta estrecho. E ‘United States Marine Corps’ y Cuerpo di Marina ta considera otro como socionan fiho. E Mariniernan Mericano di e 2do Batayon di Reconocimento ta train anualmente na Aruba, como parti di un intercambio di formacion bilateral. Banda di esey Mariniernan Hulandes di e ‘Marine Squadron Carib’ ta train anualmente na Merca durante e ehercicio cu e nomber ‘Caribbean Urban Warrior’ na Camp Lejeune, na Carolina del Norte.

            ‘Caribbean Coastal Warrior’ ta un training den cua specialmente actividadnan di buceo ta central. Esaki ta  ser planea pa e coincidi cu e ultimo fase di e entrenamento di e bushi specializa. Di e forma aki por  hasi uso di un forma eficiente di e instructornan na Aruba y esnan for di Hulanda.

            Asina'ki ta crea diferente momento di integracion y ambos banda ta familiariza nan mes cu e forma di opera y planifica.  Finalmente esaki ta amplia y profundiza e cooperacion di tur e partidonan. Esaki den caso di esfuersonan real, ta engrandece e eficacia. 

Un punto nucleo adecua pa training 

            E laman di Aruba pa ambos unidad di Marina ta un sitio sumamente adecua pa train. Mirando e combinacion di clima, temperatura di awa, claridad di awa, y sosten logistico desde Kazèrne di Marina na Savaneta, e condicionnan ta optimal pa un training eficaz y exitoso. ‘Caribbean Coastal Warrior’ ta pas den e ambicionnan di Defensa den Region Caribe pa posiciona su mes (internacionalmente) como punto nucleo pa ehercicio, tanto riba tera, como riba y den laman.

            Di e Ekipo di Buseo CARIB tin algun miembro cu tambe lo participa den e training. E ekipo di Buceo CARIB ta un capacidad vocacional cu Defensa por ubica pa nan propio trabaonan di buceo y di tal manera inspeccionnan y/of reparacionnan pier y barco. Pero tambe pa sostene socionan local den area di siguridad den Region Caribe.