Mariela van der Bosch ta mantene bibo e historia di su famia materno y paterno

Atravez di potretnan historico di su welonan: -  ORANJESTAD (AAN) – Matutino DIARIO a entrevista señora Mariela van den Bosch-Arends, propietario di e edificio di antes Hong Kong Bar-Restaurant,

na Adrian Lacle Boulevard-21 y di e Gasoline Station situa na Caya Betico Croes 128. Den ambos propiedad e murayanan ta yen di potret, hopi interesante y masha bunita di su famia, di e historia di su welonan di parti di mama y di parti di tata.

El a comenta cu e gasoline station su welo a cuminza cune na Clipstraat pero despues a muda pa Caya Betico Croes, unda e ta situa ainda.

Señora van den Bosch a conta cu e dos propiedadnan menciona, a wordo bendi den pasado pero nan a bolbe bek den famia. E propiedad na Caya Betico Croes 128, su omonan a bende cu Lago Oil Transport Co., y na Januari señora Bosh a cumpre bek, y asina a bolbe pertenece na e famia.

E edificio na Adrian Lacle Boulevard a wordo bendi, pero e dama no ta corda précis cu ken y na aña 2009 el a bin bek pa e famia ora nan a cumpre den findishi. E propiedad aki tabata di Mariela su welo materno, Jacobo Eloy Maria Arends, y esun dilanti tabata di su welo paterno, Albert Maximiliano Arends.

“Mi a dicidi cu mi kier recorda nan den e negoshi. E ora ey mi a bin cu e idea, como cu mi tabata tin un muraya blanco, mi kier a bisa ‘akinan e gasoline station a cuminza’. E no sa bon ki aña el a cuminza pero e tin entendi cu na mas of menos 1934”, señora Van den Bosch-Arends a menciona.

Riba muraya di e gasoline station tin un pintura (mural) pinta pa “Virus” cu ta tambe Mariela su pelukero. “Eynan ta e origen di pomp station ‘Arends Esso Services’ anto un 18 di Maart, el a bin den Caya Betico Croes 128”, Mariela a relata.

El a agrega cu el a dicidi di pone potretnan vooral di su welonan paterno y materno. El a haya hopi for di Rossini van Wijk  y Archivo Nacional tambe a yude basta bon.

“E ora ey mi a pone e casnan caminda nan a lanta, unda nan a biba, despues e cas di mi mama. E edificio den Adriaan Lacle Boulevard tabata Hong Kong Bar Restaurant, mi tin un potret di dje y asina mi a planea con mi a traha e potretnan”, e dama a menciona.

Señora van den Bosch ta haciendo cambionan den e gasoline station, e tin cu caba drecha parti padilanti y el a cuminza aworaki pa pone mas pomp, a move esun di diesel, pero e ta bayendo poco poco pasobra ora mester haci inversion mester wak bon con ta hacie. Cu e pandemia aki, el a bisa, situacion tabata mustra bon pero aworaki a cuminza cay atrobe.