*A enfoca su estudio riba medidanan di gobierno y con nan a afecta negoshi durante COVID
ORANJESTAD (AAN): Diaranson dia 19 di juli 2023, Marianyela Pereira a defende su tesis exitosamente y a obtene su titulo universitario di e programa Organization, Governance, and Management di Universidad di Aruba.
Marianyela a defende su tesis dilanti di e comision di graduacion cu tabata consisti di decano di e Facultad di Arte y Ciencia dr. Mieke de Droog, sra. Nadia Dresscher, sra. Birgit Kreykenbohm y director di ATIA sr. Herrick Henriquez. Ademas tabata presente famia y invitadonan di Marianyela.
E titulo di Marianyela su tesis ta “The Impact of the measures imposed by the Aruban government to contain the COVID-19 virus as experienced by owners and managers of SME’s (Small and Medium Enterprises) and Large organizations”.
Marianyela a enfoca su estudio riba medidanan implementa door di gobierno y con nan a afecta negoshi durante e pandemia.
Marianyela su motivacion pa cu e topico aki ta pa compronde den mas detaye e impacto cu e pandemia tabata tin riba negoshi y con nan a logra sobrepasa e obstaculonan economico y social cu esaki a trece.
Pa logra esaki Marianyela a entrevista doño y gerente di algun organisacion na Aruba extensivamente y asina a logra deduci e medidanan cu a haci e impacto mas grandi riba e organisacionan. Abase di e resultadonan di e investigacion a propone varios recomendacion den caso cu un situacion similar bolbe sosode.
Un palabra di gratitud ta bay na e coleganan di Universidad di Aruba, e docentenan di e departamento di OGM, e participantenan di e estudio y esnan pafo di Universidad di Aruba cu a contribui den un manera of otro den e logro aki.
{gallery}Marianyela Pereira a obtene su titulo di Bachelor den Organization, Governance and Management{/gallery}
