ORANJESTAD (AAN)—Señora Maria Gei, ken recientemente a cumpli su di 80 aña di edad, y a celebra e dia importante y bunita aki,
hunto cu su grupo di adulto mayor “Tiki Tin”, a comenta pa DIARIO, cu e ta sinti hopi contento, cu bida y salud.
Movimento ta su “secreto” pa keda activo y saludable. E no tin e pensamento cu ora un adulto ta yega un edad halto, tur cos ta caba. E ta gusta haci su trabaonan di cas, pues tur cos. Bari, pasa mop, laba paña, etc., cu ta tine activo tur dia.
E ta gusta y ta contento di forma parti di e grupo Tiki Tin, y e ta pura pa e dianan cu e ta bin den dje, yega. El a yama hopi danki na tur cu a prepara pa celebra su cumpleaño 80 na un manera asina bunita.
