ORANJESTAD (AAN) – Parlamentario Marco Berlis, di fraccion di MEP, a referi den conferencia di prensa na e Ley di Presupuesto 2022, cu a pasa exitosamente den Parlamento.
El a bisa cu no tabata tin mucho debate y cu e nivel a drecha hopi, aunke no na tur momento, ya cu tabata tin wega politico di parti di fraccion di AVP.
AVP a bin cu un amienda (#1), unda cu a papia politicamente tocante e alternativa di un presupuesto alternativo, unda por tin solucion riba diferente problema.
Esaki sabiendo cu ora AVP tabata den gobernacion a hinca Aruba den un mega debe cu e DGP tabata na 81%, y cu a causa pobreza na Aruba.
El a trece cune un map cu yen di documento di un presupuesto autentico, cu a wordo traha seriamente, e Parlamentario a indica.
Un presupuesto bon elabora, cu cifranan detaya unda cada florin a bay y cada florin ta bin aden, y tambe unda cu tin e diferente consehonan di Raad van Advies y tur otro instancia cu a duna comentario al respecto. Y tambe un rapport unda por wak cu gobierno ta contesta y ta elabora riba e pensamentonan di Raad van Advies.
Pero Mike Eman y su fraccion, segun parlamentario Berlis, a bin cu un presupuesto alternativo, despues cu expertonan a traha pa lunanan largo y cu seriedad pa traha un presupuesto cu ta bay yuda Aruba recupera di e desastre causa pa Mike Eman. E kier a bin cu siete punto cu algun cos skirbi y algun cifra chikito den dje sin conseho di RvA ni di CAft. Fraccion di MEP a tuma e iniciativa di manda e siete puntonan aki, cu ta un falta di seriedad total, pa instancianan concerni duna nan opinion experto den e materia aki, y a haya un conseho negativo. Pesey e ta informa pueblo cu AVP no ta tume na serio y durante ocho aña a hipoteca Aruba cu ciento di miyones di florin.
