Riba escenario durante concierto
MEDELLIN: E cantante Marc Anthony a bishita Colombia weekend pasa cu e ‘Viviendo Tour’, y tabata na Bogota y Medellin. Tur dos presentacion di e artista di salsa a wordo caracteriza pa algo cu a pasa y ta keda graba den memoria di esnan presente. Na Medellin, e famoso cantante a ricibi un golpi di boter riba escenario.
Apesar cu e boter a dal’e basta duro, Marc Anthony parce no a rabia mes cu su publico pa e acto aki, sino cu el a haci señal cu su mannan pa nan calma, y el a sigui canta e cancion ‘Flor pálida’, mientras cu publico tabata aplaudi y canta hunto cune.
E mas curioso di e acto aki, ta cu e cantante mes ta esun cu a pidi un ‘guaro’ cu ta e nomber tradicional pa aguardiente. Mey-mey di cantamneto di e cancion ‘Flor pálida’, e artista internacional a haci un pausa y a bisa publico: ‘Boso sa kico mi falta? Un aguardiente asina,” y esey a genera hopi grito di publico, y reaccion di un hende tabata pa zwaai un boter y tire riba dje.
Riba social media ta un cantidad di reaccion tin encuanto loke a pasa, y hopi a haci chiste con rapidamente e cantante a ricibi e aguardiente. Uno a hasta bisa cu e tabata cantando ‘Flor pálida’ y na final e mes a keda bleek. Nan a bisa cu e tabata un delivery rapido.
“El a pidi un bebida, y casi nan a tira full e fabrica riba dje.” Esey ta djis algun di e reaccion cu por a lesa riba social media.
No ta conoci si acaso Marc Anthony su curpa a lanta stijf e siguiente dia debi na e golpi cu e boter a causa ora di dal na su curpa.
