Cantidad di persona cu ta biba den pobreza ta sigui subi na 2023
- Con situacion na Hulanda por influencia asistencia pa Aruba?
- Inflacion di casi 10 porciento ta subi prijs di articulonan basico
ORANJESTAD(AAN)- Proximamente Gobierno Hulandes mester expresa su mes na Pueblo y entrega su plannan pa maneho di e futuro mas cercano.
Informacionnan alarmante ta alcansa DIARIO di personanan cu ta indica cu mester scrap tur loke no ta necesario riba lista di compra pa asina por tin placa pa loke ta e necesidad di mas grandi.
Ya anteriormente DIARIO a mustra riba e caida total di e forsa di compra na Hulanda, cu ta duna testimonio di e situacion mundial sumamente serio a base di entre otro e Guera di Ukraine y e futuro insigur di poder di petroleo.
E situacion na Hulanda ta empeora y cu e caida di entrada, e forza di compra di e poblacion tambe ta baha.
E cantidad di pober na Hulanda ta sigui aumenta rapidamente. Si Hulanda tabata mustra semper cu e cantidad di pobernan den su comunidad, tabata limita, awor fuentenan oficial ta mustra con pobresa ta subi manera fli den biento di horcan.
E poder di compra di famianan a baha atrobe cu casi 7 porciento segun fuentenan oficial cu ta indica cu inflacion na 2022 por resulta di ta casi diez porciento y lo sigui subi na 2023 hunto cu costo di bida.
Gobierno Hulandes mester presenta su solucionnan pa e situacion sumamente pisa cu ta manifesta su mes pa Pueblo Hulandes, cu tabata wordo considera uno di e nacionnan cu mas facilidad financiero na mundo.
E hecho cu sigur pa paisnan pober, Hulanda tabata wordo considera como un paraiso, ta un spiertamento pa henter mundo.
Fuentenan di DIARIO na Hulanda ta papia di e miedo existente di hende pa haci gasto den e situacion, cu ta empeora y cu no ta haci ningun problema nobo posibel.
Kico e situacion na Hulanda lo significa pa e asistencia cu Hulanda semper tabata duna na e islanan den Caribe, ta un pregunta cu informantenan na Hulanda no por a contesta.
Si a wordo mustra na DIARIO cu politiconan Hulandes mester tene e sentimentonan causa pa condicionnan di bida di Hulandesnan na bista.
Mester tene na consideracion tambe cu varios factor ta uni den problemanan na Hulanda manera e forma cu clima ta afecta e pais y su produccion di cuminda, loke ta afecta prijsnan.
Generalmente ta papia di un situacion sumamente serio cu a desaroya na e pais cu ta mira e cantidad di pobernan crece.
No tin placa pa “koekje” un informante a indica pa asina duna prueba di e situacion serio cu e pais, cu hopi Arubiano ta considera refugio, ta confronta.
