Manifestacion di taxistanan a stagna trafico dilanti di Bestuurskantoor

ORANJESTAD (AAN):  Dialuna mainta, algo pasa di 9' or, un grupo basta grandi di taxista a inicia un manifestacion cu un rij di auto cu a bay finalisa dilanti di Sala di Parlamento na L.G. Smith Boulevard.

            Cu  pitamento ariba caminda  e taxistanan a yega na nan destino pa asina manifesta dilanti di e gobernantenan y parlamentarionan, cual mayoria ta ainda cu vakantie of ta bayendo cu vakantie den e dianan aki.

            Sinembargo, e manifestacion aki a causa cu e caminda aki cu ta un ader principal den centro di ciudad a keda practicamente blokia cu tantisimo taxi cu a bay para dilanti di e edificio di gobierno.

            Cuerpo di Polis a yuda tene e situacion bao control y a logra pa un via, esun cu direccion pariba, por a keda disponibel pa trafico por a circula. Pero por a mira si, cu e otro banda si tabata completamente cera y ni un bicicleta por a circula.

            Por a nota riba e red social di facebook cu hopi turista tabata asombra cu e manifestacion aki. Hopi di nan a wordo stroba tambe pa yega na nan destino, esta airport of algun atraccion turistico den e area.