Minister Dangui Oduber
ORANJESTAD (AAN): E siman aki a tuma lugar reunionnan pa trata presupuesto di Ministerio di Turismo y Salud Publico, cu ta bou encargo di Minister Dangui Oduber. Diabierna den oranan di mainta esaki a keda aproba.
Pa loke ta trata cartera di Salud Publico, Minister Oduber a presenta su maneho pa e siguiente aña, cu lo wordo enfoca specialmente riba prevencion.
Salud Publico
Den e cartera di Salud Publico Minister Oduber a elabora riba su maneho cu ta basa riba prevencion. Pa prome biaha den historia Aruba nos tin un plan nacional di prevencion riba malesanan NCD’s cu ta aproba pa Pan American Health Organization (PAHO). E plan nacional di prevencion ta un plan extenso cu e meta pa baha e cantidad di malesanan NCD’s bou e poblacion di Aruba. E ta un plan pa a largo plazo yega na un fondo di AZV mas sostenibel.
NCD’s ta encera malesanan manera cancer, diabetes, cardiovascular, stroke y respiracion cronico. Tur e malesanan aki ta pisa hopi riba e gastonan di AZV, por ehempel diabetes ta ocaciona cu bo riñon nan ta stop di funciona optimal y conscuentemente bo lo mester dialysa. Un pashent cu ta dialysa tin un costo di 100 mil florin anual pa AZV y tur e malesanan aki por a wordo preveni.
E implementacion di “Lands Verordening Beperking tabaksproducten” cu ta bin na vigor dia 2 di mei 2022 tambe ta parti di e plan nacional di prevencion. E ley aki ta pa proteha esnan cu no ta huma y tambe pa preveni cu nos hobennan ta cay den e abismo aki door di subi e edad di compra di sigaria pa 21 aña di edad.
Den cuadro di e plan nacional di prevencion Minister Oduber a anuncia tambe cu dentro di 2 siman lo bay lansa e “Aruba Healthy Lifestyle Center”. E centro aki lo bay enfoca riba personanan cu ta sobrepeso y cu ta cay den e grupo di risico pa haya malesanan NCD’s. No solamente adulto pero tambe nos muchanan cu ta sobrepeso pa preveni cu nan lo por haya e malesanan NCD’s cu tin un costo grandi riba fondonan di AZV. Den e centro aki nan ta haya guia di profesionalnan con pa hiba un bida mas saludabel, tambe lo ofrece guia emocional na esnan cu tin mester di dje.
Cu e aprobacion di e presupuesto 2022 Minister Oduber por sigui traha na bienestar di Aruba, sigui eleva e producto Aruba cu proyectonan bunita. Sigui crea cuponan di trabou y oportunidadnan pa nos hendenan. Sigui enfoca riba e recuperacion di nos turismo y mehoracion di cuido na Aruba.
