Algemene Rekenkamer Aruba mester bira autoridad real di placa --- *Constitucion no ta permiti Arubiano muri di hamber den pandemia --- *Reunion Fase a confirma posicion DIARIO riba uzo placa di Pueblo
ORANJESTAD(AAN)- Riba Dialuna, Parlamento di Aruba a bolbe dedica un dia na un topico, cu DIARIO a atende den un pagina.
Con mester gasta placa di Aruba segun Ley?
Uno di e leynan mas popular den e rubrica aki, ayera tabata e topico den sala di Parlamento di Aruba, cu a debati riba e placa cu a worde gasta pa Fase pa asina duna asistencia social ora e Pandemia Covid-19 a bati na porta.
Tabata un satisfaccion pa nos pa scucha con tur detaye cu tanto bez nos a trece dilanti den e rubrica aki, a bini dilanti riba e tema con ley ta bisa cu mester gasta placa di Pueblo.
Ley di Contabilidad. Ley cu mester worde aplica na tur momento ora ta gasta placa di Pueblo, tabata e topico di e reunion cu mester a atende e forma cu a aplica Fase pa yuda hende den necesidad den e temporada di Covid-19.
E rapport di Algemene Rekenkamer Aruba, e autoridad maximo riba tereno di e forma cu ta gasta placa di Pueblo, no tabata contene nada cu a pone DIARIO spierta for di un soño letargico, ya cu ta e ley aki nos ta uza cada rato cu papia di uza placa di Pueblo y abuso cu por comete cu placa di Pueblo.
Ora resumi loke a bini dilanti den e reunion di Parlamento ayera, mester bolbe atrobe na loke DIARIO a trece dilanti na tanto ocasion pa loke ta trata maneho di placa na Aruba.
DIARIO for di inicio di e pandemia di Covid-19 a splica cu tabata na 2020 cu a bira evidente cu e Ley di Contabilidad cu rason ta exigi pa politiconan no maneha e pais a base di debe, pero cu mester reserva placa pa momentonan cu calamidad bati na porta.
Semper nos a cualifica e ley aki como un base di bida diario na Aruba, ya cu e Arubiano den su bida priva, semper a reserva placa pa casonan cu malesa y problema serio bati na porta.
E ponencianan di DIARIO cu e maneho di 2010 pa Aruba biba a base di debe, tabata motibo cu e caha di placa di Aruba na 2020 tabata un bari sin bom y cu Aruba no tabata tin placa pa sostene ciudadanonan cu a keda sin entrada ora Covid-19 a pone fin na entrada di trahador cu mester a keda cas.
DIARIO a mustra cu na e momento e placa cu a worde gasta entre otro na fiestpad, mester a sirbi como vehiculo pa e Arubiano sobrebibi e pandemia Covid-19.
E Leynan di Aruba semper a tene pobreza na consideracion y ta sostene personanan cu mester di yudansa pa nan sobrebibi. E aspecto social semper ta presente den e leynan di Aruba.
E problema di 2020 tabata cu ora Covid-19 a bati na porta, e maneho a base di debe y no di creaccion di reserva, a comberti Aruba den un bari sin bom.
Awor den e aplicacion di Fase a cumpli cu Ley? Ayera a keda demostra atrobe cu mester cambia e procedura y cu mester duna Algemene Rekenkamer Aruba den practica un lugar mas importante den situacionnan manera a presenta.
E control directo cu Ley ta entrega na Algemene Rekenkamer Aruba, protector di e Ley di Contabilidad, mester entrega e colegio halto un lugar mas directo den e forma cu ta tuma decision.
E contenido di e reunion di ayera no tabata nada nobo pa DIARIO, pero mas bien confirmacion cu ta a base di Ley DIARIO ta lanta para pa defende e interes di e Arubiano ora ta gasta su placa.
For di momento cu 2020 a bati na porta, DIARIO a insisti riba falta di un reserva cu mester a worde crea cu e placa cu a gasta na entre otro fietspad, cu no ta un necesidad pa e pais.
Den e reunion di Parlamento, Ley a papia un palabra cla. Awor ban cambia e Ley pa asina Aruba no ta un bari sin bom ora necesidad presenta, pero pa Aruba tin reserva pa honra e base constitucional di Aruba, cu no ta permiti ningun Arubiano muri di hamber den pandemia!
