Manchebo Beach Resort & Spa a celebra nan di 55 aniversario

ORANJESTAD (AAN): Manchebo Beach Resort & Spa a celebra nan di 55 aniversario cu un recepcion den pavilion,

hunto cu miembronan di equipo di e resort, Prome Minister Evelyn Wever-Croes, Minister di Turismo y Salud, Danguillaume Oduber y otro invitadonan special.

“E vision di Manchebo Beach Resort a wordo concebi originalmente pa dos piloto di KLM den añanan 60 y nan a habri oficialmente nan portanan dia 16 di december 1966 pa huespednan por  disfruta di Eagle Beach. E pioneronan legendario di turismo Ike & Grete Cohen tabata na cabes di e hotel durante hopi aña y awendia Manchebo ta un resort boutique di 4 strea cu un enfoke riba bienestar y culinaria excepcional pa nan huespednan”, segun Edgar Roelofs, gerente general di Manchebo.

E propietarionan nobo di Manchebo a cumpra e resort dia 15 di november 2021 tambe tabata presente pa e celebracion. “Nos famia ta hopi orguyoso di ta doñonan nobo di emblematico resort den Eagle Beach y nos ta spera di por sigui cu e legado di Manchebo den añanan venidero. Pabien na equipo di Manchebo pa brinda un vakantie asina maraviyoso na bishitantenan di Aruba”, segun Lukasz Slominski.

Parti di e celebracion tabata e reconocimiento di Ministro di Turismo y Salud, Dangui Oduber pa "30 aña di servicio den industria turistico di Aruba". Palabranan di gradicimento a wordo extendi y un plakkaat a wordo entrega na miembronan di equipo di Red Sail Sports y Manchebo Beach Resort & Spa pa nan dedicacion na turismo y exito di e isla.

Ademas, Prome Ministro y Minister di Turismo hunto cu Peter y Marian de Hoop a inaugura oficialmente e recien construi, Lobby Store, opera pa Red Sail Sports.