Management Team contento cu Colegio EPI a obtene su “Erasmus Accreditation”

ORANJESTAD (AAN) – Señor Andres Geerman, di e Management Team di Colegio Educacion Profesional Intermedio “EPI”,

den entrevista cu DIARIO, cu hopi satisfaccion y contento, a declara cu Colegio EPI a obtene su “Erasmus Accreditation” y esaki ta nifica cu pa e siguiente tres añanan tin fondonan disponible pa manda un parti grandi di studiantenan afo.

            Geerman a expresa cu manera semper e ta bisa “e mundo aki ta habri” pasobra den e ultimo dos añanan studiantenan di Colegio EPI a wordo manda na Mexico, Jamaica, Belgica, Hulanda, Irlanda, y e bida t’asina cu “bo mester siña bo hendenan haya chens”, el a expresa.

            El a agrega cu Colegio EPI ta manda studiante afo, pero e tambe ta ricibi studiantenan di afo. “Pa aña nos ta haya tres pa cuater grupo cu ta bin di Irlanda, Belgica, Italia, kiermen un intercambio e ta pa habri e mucha y no tin nada mas bunita cu wak e mucha ora e ta subi avion, y mira su tata y mama asina contento”, señor Geerman a señala.

            El a subraya cu e studiantenan awendia tin chens, e industria tin trabao y esnan cu kier traha MBO ta habri e portanan. “Nos ta haci cambio, y claro, cambio ta trece stress, cu cambio no ta tur hende ta sinti mescos, pero e pensamento semper ta pa bo ta miho pa mañan. Kiermen bo ta drecha loke bo tin, bo tin cu cambia mescos negoshi a cambia. Antes bo tabata traha bo n' ta worry pa bay cas, awo no! Bo tin cas bo tin famia, y e industria tambe mester siña”, el a señala.

            El a agrega cu Merca un trahado, durante su prome diez, diesun aña, ta cambia nuebe biaha di trabao te ora e haya su rumbo.