MANA lo habri su portanan gratis pa publico riba Dia di Betico

Marguerita Wever ta informa:

ORANJESTAD (AAN) — Marguerita Wever, di Seccion Educacion y Presentacion di Museo Arkeologico Aruba (MANA), a duna di conoce cu un biaha mas MANA lo habri su portanan gratis pa publico, riba Dia di Betico, Diahuebs awo 25 di Januari, den horario di 10 or di mainta pa 2 or di atardi.

            Marguerita a menciona cu lo tin hopi actividad nobo, y un di nan ta un produccion audio-vision traha pa e artista local Natusha Croes, cu a desaroya dos espacio inmersivo, fascinante, na Museo Arkeologico. Un di nan den regenbak unda e lo bay duna presentacion di mas f menos cinco minuut, entre 12’or y 1’or di merdia, y pa esaki mester haci un registracion pasobra e cupo ta hopi limita, y e espacio ta hopi chikito y no por tin hopi hende alavez eyden.

            Tambe lo tin un instalacion nobo den e espacio di arte contemporaneo den e sala di exposicion permanente, cu lo habri tambe riba Dia di Betico y cu tres sesion interactive pa publico, y pa esaki tambe tin cu registra. Ambos presentacion ta inedito y fascinante.

            Alavez lo habri e Cas Dundun, cu tambe ta bira e entrada pa publico, y akinan por cuminza disfruta di e produccion cu ainda ta trahando riba dje “Manteniendo herencia na bida” cu ta conta historia di e edificio y di e famia Ecury y e guera cu nan a biba na Aruba. Director interino Pancho Geerman lo ta presente pa duna splicacion tocante esaki.

            E dos Arkeologonan di MANA tambe lo ta presente den e sala di exposicion, asina cu cualkier pregunta cu e publico tin tocante arkeologia di Aruba, por haci’e cu e personanan indica. Banda di esaki e persona cu a desaroya e crucigrama hopi popular “Conoce bo isla” cu ta duna bo hopi informacion tocante nos Isla lo ta presente, pa bende e crucigrama, den un paket prijs algo mas atractivo, pa e dia aki.

             Tambe e Coro Amigonan di Hesus y Maria, lo percura pa e “Kids Corner” y nan lo bin cu hopi actividad leuk pa mucha. Ademas nan lo bende un dushi pasaboca y coi bebe p’asina recauda fondo pa nan coro.

            Marguerita a invita un y tur pa pasa na Museo Arkeologico ser conoci cu artistanan hoben, sostene e muchanan di e Coro Amigonan di Hesus y Maria y bin wak tur cos nobo cu MANA tin pa ofrece.