Mahestuoso Carnaval di Mucha na San Nicolas 

ORANJESTAD (AAN)—Carnaval 70 di Aruba a sobresali pa e cantidad grandi di participantenan, manera por a mira Diadomingo atardi tambe den e mahestuoso Parada di Mucha na San Nicolas.

Seis grupo a participa y por calcula cu riba caminda tabata tin mas cu mil mucha, cu a pone e alegria, colorido, fantasia, baliamento y gracia den e parada aki. Un parada hopi alegre cu musica sin stop, y ni e calor inmenso cu tabata haci a para e ritmo di e muchanan.

Tur e Kids Carnival Groups a participa cuminzando cu e grupo di Noord cu a habri e parada cu su precioso Reina Infantil 2024. Fenomenal e parada tabata unda nos muchanan a mustra nan talento y nan stimacion pa e tradicion carnavalesco cu ta distingui e pueblo di Aruba, grandi y chikito, ya pa 70 aña caba, y cu pa 2024 algo hopi special a pasa, cu a bira mas grandi y super genial! Pabien muchanan y pueblo di Aruba en general.