Pais rico Qatar a intermedia pa Merca y Caracas negocia
- Awor cu sancionnan di Merca a wordo elimina parcialmente
- Tambe tin bista riba terminal di crudo na Aruba
CARACAS: A bin sali na cla, cu pa mas di un aña e pais Qatar di medio oriente a yuda planea y ta anfitrion di combersacionnan entre oficialnan halto di Merca y di Venezuela, cu a logra finalmente luna pasa ora cu Washington a elimina sancion riba e industria di energia di e pais Sur Americano. Awor e pais Arabe y un compania conglomerado di Qatar, ta tratando di inverti y saca probecho di esaki.
Apenas algun dia despues cu a elimina sancionnan dia 17 di October 2023, un compania priva di petroleo cu ta pertenece na un magnate di Qatar, esta Ghanim Bin Saad, a firma un acuerdo preliminar pa start bek un refineria di petroleo riba isla di Curaçao. Gobierno di e isla pa hopi tempo tabata spera di por resumi e operacion pa procesa y transporta crudo Venezolano pa Asia y otro mercadonan internacional.
E corant The Wall Street Journal e siman aki a ilustra con e negociacionnan aki ta ilustra e rol creciente di Qatar como un mediador internacional di conflicto ta habri mesora oportunidadnan comercial pa e estado rico na petroleo na Golfo Arabe.
E sancionnan Mericano a wordo elimina pa encurasha Caracas pa restaura democracia, y den e proceso yuda mehora suministro di petroleo y reduci e exodo di venezolanonan pa Merca.
Ademas awor, companianan di Qatar a haya hopi interes di explora inversionnan den Caribe, cu lo por beneficia di e entrada bek di Venezuela den mercado mundial di energia. Aki nan bista ta bay no djis riba Venezuela, sino tambe Guyana, Brasil, y Suriname.
No lubida cu Qatar ya caba tin lazo comercial cu paisnan latino cu ta produci petroleo, manera Mexico, Brasil, y Argentina. E compania Oryx, cu ta pertenece na Ghanim Bin Saad & Sons Group cu sede na Doha, ta sigui check mas destinacion regional, manera esun na Curaçao. E compania tin presencia caba na Caracas y Barbados, y nan website ta na Ingles y Spaño.
Oryx recien a firma un MoU pa opera e refineria na e terminal di Bullenbaai na Curaçao, y e compania Maunsell Investment Management basa na Vancouver, ta coordinando e preparacion pa Oryx firma un acuerdo final cu Refineria di Korsou pa comienso di 2024.
The Wall Street Journal a indica cu e calculo ta cu e inversion di Oryx den e refineria na Curaçao lo ta di 750 miyon Dollar. Ya caba e compania Global Oil Management Group di Merca, ta renobando un parti chikito di e refineria pa cuminsa fabrica asfalt na Mei 2024 principalmente pa mercado Mericano. Oryx ta pensando tambe pa construi un terminal chikito di LNG riba Curacao, pa reemplaza Heavy Fuel Oil como un fuente di energia y pa suministra mercadonan den region.
Oryx su plan ta pa no djis laga e refineria na Curaçao procesa crudo di Venezuela, pero pa expande esaki pa maneha gas tambe. Pero e refineria na Curaçao ta enfrenta retonan. Uno di nan ta competencia cu otro cumpradornan cu ta competi pa crudo venezolano, cu por wordo manda via barco direct pa Merca of otro mercado. Tambe tin preocupacion cu otro cargadornan por djis evita di bay na e terminal hundo di Curaçao y usa otro isla den Caribe, manera Aruba.
Ademas e bentana inicial di seis-luna pa e alivio di sancion, ta birando un riesgo pa cumpradornan aspirante di crudo manera Curaçao. Refineria di Korsou a bisa cu actualmente nan ta buscando un “licencia mas duradero” di US Treasury Department, cu ta controla e sancionnan.
