Lider di Fraccion Jennifer Arends-Reyes:
ORANJESTAD (AAN): Na ocasion di comienzo di aña escolar 2026-2027, Parlamentario Jennifer Arends-Reyes ta desea tur maestro, studiante, mayor, director y personal di scol un regreso exitoso. E ta dedica un palabra special na maestronan, cu diariamente ta carga cu e responsabilidad grandi di educa, inspira y prepara nos muchanan pa e retonan di mañan.
“Sin maestro no tin enseñansa, y sin enseñansa no tin progreso. Tras di cada mucha cu logra avansa, tin un maestro cu a motiva, guia y kere den dje. E trabao di un maestro no ta termina ora bel ta bati. Hopi biaha nan ta sigui prepara les, corigi trabao y preocupa nan mes pa bienestar di nan studiantenan,” Arends-Reyes a expresa.
E regreso na scol e aña aki ta tuma lugar den un periodo importante pa sector di enseñansa. Despues di decadanan wardando, a logra duna un paso historico den reconocemento di maestronan. Bou di Gabinete AVP–Futuro, Fase 1 di e restructuracion salarial den enseñansa a drenta na vigor for di 1 di januari 2026.
E restructuracion ta coregi desigualdadnan historico den e escalanan salarial y ta iguala e escala di maestronan di scol basico cu esun di docentenan den enseñansa secundario. Tambe e ta harmonisa e compensacion di directornan di scol na 25%, cual lo conta pa nan pension.
Como parti di e proceso, a crea un trayectoria acelera pa maestronan cu ta bay cu pension dentro di un periodo di tres aña, pa nan tambe por beneficia di e ahustacion salarial prome cu nan retiro.
“Esaki ta un logro concreto di Gabinete AVP–Futuro y resultado di dialogo cu sindicatonan. E ta un muestra cu reconocemento no por keda solamente na palabra; e mester traduci den accion y den un compensacion mas husto,” Arends-Reyes a declara.
E parlamentario tambe a resalta e medidanan social cu Gabinete AVP–Futuro a anuncia pa sostene famianan cu menos recurso durante e periodo di regreso na scol. E aumentonan den diferente forma di asistencia, incluyendo aporte pa cuota y materialnan escolar, ta contribui na alivia e carga financiero di mayornan y ta duna mas mucha oportunidad pa cuminsa scol debidamente prepara.
Sinembargo, segun Arends-Reyes, e trabao no ta termina cu e prome fase di restructuracion. Mester sigui implementa e siguiente fasenan y duna atencion na otro retonan cu ta influencia calidad di enseñansa, entre otro carga di trabao, cantidad di studiante den klas, disponibilidad di personal di sosten, formacion profesional, materialnan educativo y condicion di nos edificionan escolar.
“Nos maestronan mester sa cu nan no ta para nan so. Parlamento y Gobierno mester sigui scucha nan y traha pa crea e condicionnan cu nan mester pa por duna enseñansa di calidad,” e parlamentario a enfatisa.
Arends-Reyes ta cera deseando cada maestro hopi sabiduria, pasenshi y satisfaccion durante e aña escolar nobo.
“Na tur maestro: masha danki pa a scoge e profesion bunita aki. Boso trabao ta laga un marca den bida di nos muchanan y den porvenir di Aruba. Na tur studiante, mi ta desea hopi exito. Siña cu entusiasmo, respeta bo maestro y nunca stop di kere den bo mes. Un feliz regreso na scol 2026-2027 pa nos comunidad escolar completo.”
