E advertencia mas importante di DIARIO contra CITGO a rementa
- Porta na Merca tambe ta cera pa refugiadonan Venezolano
- Maduro ta acusa Merca di ladronicia di Citgo y ta exigi traspaso
ORANJESTAD (AAN)- Aruba tabata completamente bou influencia di e contracto cu Gobierno Mike Eman a cera cu Nicolas Maduro pa e compania Citgo y asina Maduro por a haya poder economico na Aruba.
DIARIO den uno di e investigacionnan grandi cu el a conduci na nivel internacional pa interveni na interes di e Pueblo di Aruba, a presenta e berdad na Aruba.
Prome Ministro Evelyn Wever-Croes tabata e gobernante Arubano cu tabata tin e curashi di enfrenta Citgo y asina a logra debolbe Pueblo di Aruba e yabinan di e refineria caminda awe industrianan moderno mester establece nan mes.
Tempo semper ta pone berdad riba mesa y awe DIARIO ta bolbe entrega prueba cu el a actua na defensa di e Pueblo di Aruba ora el a presenta e berdad di e aventura di Citgo.
Na e momentonan aki, Venezuela ta un centro di tension local y internacional mientras e pais ta prepara su mes pa eleccionnan cu ta dicidi riba futuro di e pais cu un Pueblo den problema grandi.
Prome Ministro Wever-Croes siman pasa a mustra cu e relacionnan cu Gobierno di Venezuela no por cambia si no tin cambio den e maneho di Venezuela.
Na e momentonan aki, Aruba mester ta atento cu e realidad di Venezuela caminda Oposicion proximamente mester tene su eleccionnan primario na caminda pa eleccion, cu te ainda tin gran indicacion cu e lo no ta liber y democratico.
DIARIO semper a indica cu presencia di Citgo na Aruba por a hinca Aruba den un problema y hasta escandalo internacional.
E ponencia di DIARIO e tempo awe ta haya tur validez na momento cu Citgo ta wordo uza pa Gobierno di Nicolas Maduro trata na pone Interpol contra Juan Guaido.
Segun e acusacion di Nicolas Maduro, Juan Guaido lo a uza placa di Citgo, pa financia su mes y paga entre otro su gastonan pa procesonan legal.
Juan Guaido a bay busca proteccion na Merca, caminda e ta defende su mes contra Nicolas Maduro.
E situacion caotico pa cual DIARIO na bienestar di Aruba a adverti na 2018, awe ta realidad. Citgo ta parti di un caos nacional di Venezuela den turbulencia mundial.
Mientrastanto Aruba tambe mester di seguridad maximo na e momentonan aki segun informantenan cu a indica.
Merca a dicidi cu e no por laga porta habri sin mas pa e grupo grandi di Venezolanonan cu ta busca nan refugio rond mundo, cu no ta capaz pa acomoda e Miyones y Miyones di Venezolanonan cu a bira hende sin tera ni posicion.
Na e momentonan aki pues tin un guera pisa di Maduro pa Merca debolbe Citgo cu segun Nicolas Maduro a wordo horta for di Venezuela dor di Merca, cu a deshaci di e posibilidad pa Nicolas Maduro por a saca placa di Citgo y uza pa su Gobierno manera e tabata haci ora el a bin cu e proyecto Citgo, Aruba.
Den porta di Aruba situacion ta sumamente serio segun tur informante cu ta di acuerdo cu Gobierno di Aruba cu e situacion cu Venezuela, awor menos cu nunca, no por ta realidad, manera ta pensamento tambe di Union Europeo.
